Polar Seafood Danmark kalaallinit 100 procentimik pigineqalertoq
Polar Seafood Danmark kalaallinit tamakkiisumik pigineqalerpoq.
Polar Seafood Greenlandip, Islandimiut aalisarnermik ingerlatseqatigiiffiata Brimip Polar Seafood Danmarkimi piginneqataassutaa, akuersissutaasussat tamarmik inissereermata, pisiaraa.
Nunatsinni suliffeqarfik namminersortunit pigineqartuni annersaat tusagassiuutinut nalunaarummi paasissutissiivoq.
’Ulloq pingaarutilerujussuaq’
Pisinerup 925 millionit koruuninik nalillip, Polar Seafood Greenland Polar Seafood Danmarkimik 100 procentimik maannamit piginnittuulersippaa.
Polar Seafoodimit paasissutissiineq naapertorlugu, niuernerup piginnittoqarnikkut suleriutsit aalajangiisarnerillu ajornannginnerulersissavai.
- Polar Seafood Greenlandimut ulloq annertuumik pingaaruteqarpoq. Niuernerullu inaarutaasumik naammassineratigut piginnittoqarnikkut suleriutsit aalajangiisarnerillu ajornannginnerulissapput, suliffeqarfiullu nunatsinni nunaqavissunit ineriartortinneqarlunilu, naleqartitat tunngavigalugit ingerlatsinissamut periarfissaat pitsaanerulissapput,” pisortaq Bent Salling oqarpoq.
Nunatsinni aningaasaliinerorusuttoq
Polar Seafood Danmarkip tamakkiisumik pigilerneratigut nunatsinni siunissaq ungasissoq eqqarsaatigalugu, aningaasaliissuteqartarnissamut tunngavissat suli aamma pitsaanerulissapput.
Pisortap Miki Brønsip, suliffeqarfimik ineriartortinneqarnissaa kisiat eqqarsaatigineqannginnerarpaa:
- Suliffeqarfitta ineriartortittuarnissaa kisiat eqqarsaatiginngilarput. Nunatsinni inuiaqatigiit naleqarnerulersinnissaat kissaatigaarput. Niuernerullu matuma nunatsinni patajaannerusumik akisussaaqataanitsinnik annertusaanikkut, nunaqavissut, suleqatit aalisartullu, suli pitsaanerusumik, siunissarlu ungasinnerusoq eqqarsaatigalugu, suleqatigiuarnissaannut periarfississavaatigut, taanna oqarpoq.
Polar Seafoodip inuiaqatigiinni akisussaaqataanermut suliniutit, assersuutigalugu, Aasianni suliffeqarfiit piuinnarnissaanik ilungersuuteqarsimanertik ilaatigut eqqaavaa.
Suliffeqarfik tunisassiorfimmut tunisassiassanik tulaassuiuartoqarnissaa qulakkeerniarlugu piffissami sivisuumi sulissuteqarpoq, suliffeqarfimmit paasissutissiisoqarnera naapertorlugu, taamaaliornikkut illoqarfimmi kommunimilu suliffissaqartitsinerulissaaq.
Milliardilikkaat kalaallinut tunniunneqartut
Polar Seafood Greenlandip inuiaqatigiinnut 2025-mi tapiissutigisimasani 1,33 milliardit koruuniusut paasissutissiissutigaa.
Taakkunanit 525 millionit koruunit akissarsiassanut immikkoortinneqarsimapput, 447 millionit koruunit aalisartunut immikkoortinneqarsimapput, 220 millionit koruunit akileraarutinut 138 millionit koruunillu akitsuutinut immikkoortinneqarsimallutik.
Suliffeqarfimmit paasissutissiissutigineqartoq naapertorlugu, aningaasat suliffissaqarniarnermut aningaasaliinernullu ilaatigut meeqqeriveqarfinnut, atuarfeqarfinnut, utoqqarnik isumaginninnermut, nakorsaqarnermut kulturikkullu sammisassaqartitsinernut atorneqassapput.
Bent Sallingip kalaallinit tamakkiisumik pigineqalernera qangali anguniarneqarsimasoq piviusunngornerarpaa.
- Qangali anguniagarput, Polar Seafood Denmarkip nunatsinni najugaqavissunit piginnitseqarnissaa, maanna piviusunngorpoq. Tulluussimaaqaagullu, siunissami ukiorpassuarni nunatsinni suli ineriartortitsinissamut suliffissaqartitsinermullu periarfissat annertusinerinik nassataqassammat, taanna oqarpoq.
