Polar Seafood sinneqartooruteqangaatsiartoq – Aasiannili tunisassiorfik pillugu nutaarsiassaqanngitsoq
Aalisakkat akigissaartut aalisakkallu Issittumit piumaneqarnerujussui Polar Seafood Greenlandimut ajunngilluinnartumik ukioq manna kinguneqarluartitsipput.
Suliffeqarfiup ukioq 2025 erniat akileraarutillu ilanngunnagit 236 millionit koruunit sinnerlugit sinneqartooruteqarluni naggaserpaa.
Polar Seafood tusagassiuutinut nalunaarummi allappoq.
- 2025-mi angusat maniguulluta tulluusimaarutigaavut. Angusarissaarnermulli pissutaaqataapput aalisarluarsimanerup saniatigut tunisassiatta nunarsuarmi akigissaarsimaneri, pisortaaneq piginneqataasorlu, Bent Salling tusagassiuutinut nalunaarummi oqarpoq.
2024-mimi sinneqartoorutiniit 2025-mi sinneqartoorutit 141 millionit koruuninik amerlanerupput. Ingerlatseqatigiiffissuarmit oqaatigineqartoq naapertorlugu qalerallit, avaleraasartuut saarulliillu akisunerunerat sinneqartooruteqartitsingaatsiarput.
Polar Seafoodimiilli raajarniarnerup ilungersunartoqarsimanera erseqqissarneqarpoq aqutsisuniillu ukiup sinnerani taamaaginnassangatinneqarluni.
Aalisakkerivissuup Aasianni tunisassiorfimmi suliffissaqarniarnissap politikkikkut aaqqiivigineqartariaqarnera suli erseqqissaassutigaa, tassani kaaviiaartitat annersaat raajaneersuuneri matuneqariaannaaneralu aqutsisuniit siornatigut eqqartorneqartarpoq.
Politikkikkut aaqqiagiinngissut
Naalakkersuisut avataasiortunut aalisagartassiissutinut neqerooruteqartitsineq atorunnaarsinneqartoq tallimanngormat saqqummiuppaat, Namminersorlutillu Oqartussat neqerooruteqartitsinissamut nutaamut tunngaviliorput.
Nunatta kitaani qaleralittassiissutinik agguaassinerup ilaa Aasianni tunisassiortoqarnissaanut aamma pisassiissutinik piginnittup illoqarfimmi suliffissanik amerlanerpaanik periarfissaqartitsinissaanut qulakkeerinnissinnaasoq tassani ilaatigut allassimavoq.
Polar Seafoodip kilisaat Polar Nataarnaq raajartassiissutit ikiliartornerata malitsigisaanik 2025-mi tunivaa, suliffeqarfiulli oqarnera naapertorlugu tamanna Aasianni tunitsiviup piuinnarnissaanut alloriarnermi siulliuvoq:
- Polar Nataarnap tuninera pisariaqarsimavoq, maannakkullu neriuppugut Naalakkersuisut Aasiannilu soqutigisaqaqatigiit peqatigalugit tunisassiorfimmi suliffiit – taamatullu illoqarfiup - piuinnarnissaannut aaqqiissuteqarnissaq anguneqassasoq, piginneqataasoq, Miki Brøns oqarpoq.
Naak Polar Seafoodip raajartassiissutit ikiliartornerat ilungersuutigigaluarlugu 2024-mi kaaviiaartitai 1,58 milliardit koruuniusut 2025-mi 1,74 milliardit koruuninut amerlipput, tusagassiuutinut nalunaarummi nutaami allassimavoq.
- Pitsaasumik inissisimalluta aalajaatsumillu aaqqissuussaaneq tunngavigalugu 2026 aallarnerparput, raajarniarnerullu ilungersunartoqarsinnaanera eqqumaffigaarput, Miki Brøns oqarpoq.
Akissarsiat namminerlu aningaasaatit
Polar Seafoodip suliffeqarfik inuiaqatigiinnut akileraarutitigut, sulisunut akissarsiaqartitsinikkut aalisarsinnaanermullu akiliutitigut tapiissuteqartartoq tusagassiuutinut nalunaarummi oqaatigaa.
- Polar Seafood Greenlandip illoqarfinni nunaqarfinnilu aningaasaqarnikkut toqqissisimanermut aamma suliffissaqarneq tunngavigalugu innuttaasut aningaasaqarnerinut, tassa inuussutissaqarnermut, inigisanut, meeqqerivinnut, atuarfinnut, utoqqarnik isumaginninnermut aamma napparsimaveqarfinnut atorneqartartunut, tapertaanerata ersarinnera tulluusimaarutigaarput, Miki Brøns oqarpoq.
Suliffeqarfik sulisunut 525 millionit koruuninik 2025-mi akiliuteqarpoq, 447 millionit koruunit aalisartunut avataaneersunut, 220 millionit koruunillu akileraarutinut aamma 138 millionit koruunit aalisarnermi akitsuutinut.
- Inuiaqatigiinnut tapersiissutigisartakkavut – ukiut tamaasa - 1 milliardit koruunit sinneqartut, sulisuvut pikkorissut suleqatigilluarlugit anguniagaqassuseqarlutalu sulilluarnitsigut pilersinneqartarput, Bent Salling oqarpoq.
Suliffeqarfiup nammineq aningaasaatai 2024-mi 1,6 milliardit koruuniupput. Aningaasaatigineqartut sinneqartooruteqangaatsiarinerup nutaap malitsigisaanik amerlanerulernissaat naatsorsuutigineqarpoq.
Polar Seafood qatanngutigiinnit Bent Friis-Sallingimit aamma Laila Friis-Sallingimit kiisalu Miki Brønsimit kalaallillu soraarnerussutisiniaqalernissamut aningaasaateqarfianit Sisamit pigineqarpoq.
