Polar Seafood Danmarkimi ingerlatsivimminni tamakkiisumik piginnittunngussasut
Aalisakkanik niueruteqarneq nunatsinnut suli qaninnerulersinneqarpoq.
Polar Seafood Greenland A/S-ip Islandimiup, Brim hf-ip Polar Seafood Denmarkimi piginneqataassutaa pisiaraa.
Polar Seafood tusagassiuutinut nalunaarummi allappoq.
- Isumaqatigiissutip uuma nassataanik piginnittuuneq ataatsimoorfiulerpat suleriutsit ajornaannerulersinneqassapput. Aalajangiiniarnerit piaarnerusumik naammassineqartalissapput, nunatsinnilu sorlaqarnerput tunngavigalugu suliffeqarfissuup pigisatta ineriartortinnissaanut periarfissat pitsaanerulissapput, pisortaq Bent Salling tusagassiuutinut nalunaarummi oqarpoq
Polar Seafood Denmark Polar Seafood Greenlandimit aamma S-13 Holding ApS-imit naligiimmik pigineqarpoq. S-13 Holding ApS Islandimiut aalisakkeriviutaata Brim hf-ip Danmarkimi suliffeqarfiutigaa.
Isumaqatigiissut nutaaq naapertorlugu, Polar Seafood Denmark isumaqatigiissummi piumasaqaatit oqartussanit akuerineqarlutik eqqortinneqarpata Polar Seafood Greenlandimit tamakkiisumik pigineqalissaaq.
925 millionit koruuninik pisineq pineqartoq, Brim hf-ip nammineq nittartagaani nalunaarummi allassimavoq.
Kalaallit piginnittut
Pisineq nutaaq suliffeqarfissuarmi aalajangiinerit – aamma Danmarkimi ingerlanermut tunngatillugu nunatsinnut qaninnerulernerannik qulakkeerinneqataassaaq.
- Siunnerfipput ersarinnerulerlunilu nunatsinni naleqartitat tunngavigalugit – tassa aalisarneq sulisugullu eqqarsaatigalugit – ingerlatsinerput suli nukittunerulissaaq, Miki Jonas Brøns tusagassiuutinut nalunaarummi oqarpoq:
- Ilutigalugulu Danmarkimi suliffimmik ingerlataqarnerput nukittorsarneqassaaq, suliffeqarfiullu taassuma aqunneqarnerata aammalu pingaarnersiuinerup nunatsinnit ingerlanneqarnera ersarinnerulissaaq.
Pisinermut isumaqatigiissut naammassineqarpat Polar Seafood Denmarkimut piginnittuuneq Polar Seafood Greenlandimit tamakkiisumik pigineqalissaaq.
Qatanngutigiit Bent Friis-Salling aamma Laila Friis-Salling Polar Seafood Greenlandimut piginnittuussutip 20 aamma 25 procentiat ullumikkut pigaat. Tamatuma saniatigut kalaallit soraarnerussutisianut ingerlatseqatigiiffiat, Sisa suliffeqarfiup 5 procentianik 2025-p naaneraniilli piginnittuulerpoq.
Polar Seafoodimut piginnittuussuteqartoq kingulleq annerpaamillu piginnittuusoq tassaavoq Miki Jonas Brøns, taannalu ingerlatseqatigiiffik danskinit piginneqataaffigineqarani pisinnaasai naammattut isumaqarpoq:
- Piffissalli ingerlanerani uagutsinnut paasinarsiartuinnarsimavoq Polar Seafoodimi piginnittut piginnaasamikkut ingerlatsisinnaassuseqarluarlutillu nunat tamalaat akornanni attaveqaateqarneq namminneerlutik suli annertusarsinnaalluaraat.
Pisinermi aalajangiinerit Danmarkimilu ingerlatsinerup ingerlatsinermut pingaarnerusut ilaatinneqarnerulissaa aamma qulakkeerneqassapput.
Aningaasaliinissamut periarfissaqartoq
Polar Seafood ukiuni kingullerni tallimani akileraareernermi 77 aamma 212 millionit koruuninik sinneqartooruteqarpoq.
Siornalu 172 millionit koruuninik sinneqartooruteqartoq Sermitsiap allaaseraa. Tamanna 2024-mut sanilliullugu 74 millioninik sinneqartooruteqarneruvoq.
Polar Seafoodip tunisassiorfia matunissamut aarlerinartorsiortoq, KNR-ip qaammatini kingullerni arlalinni saqqummiuttarpaa.
Aaqqiissuteqartoqarnissaali sulissutigineqassasoq, aalisarnermut naalakkersuisup, Peter Borgip oqaatigaa.
Danskit ingerlatseqatigiiffiannik pisineq nunatsinni aningaasaliinissamut periarfissarissaarnerulersitsissasoq, pisortap, Bent Friis-Sallingip tusagassiuutinut nalunaarummi oqaatigaa.
- Piginnittut ataatsimoortilernerisigut suli nukittunerulissaagut. Aningaasaliissuteqarnissanut aammalu siunissaq ungasissoq eqqarsaatigalugu nunatsinni nunallu tamalaat akornanni ineriartortitsinissamut periarfissagut pitsaanerulissapput.
Pisinissamut isumaqatigiissutip 2026-p affaani kingullermi naammassineqarnissaa naatsorsuutigineqarpoq.
