Aasianni tunisassiorfiup matunissaa suli nalorninartumiittoq

Aasianni tunisassiorfiup matunissaa aarlerisaarutigineqarpoq.

- Taakku kisitsisiinnaanngillat, inuinuku pineqartut. Aasiammiut, Polar Seafoodimi piginneqataasoq, Laila Friis Salling sapaatip akunnerata naanerani akerliussutsimik takutitsisunut oqarpoq.

Tunisassiorfiup matuneqarnera illoqarfimmut kingunerluuteqartussaagaluartoq, suli aaqqiissutissarsisoqanngilaq. 

- Ernumassutisi tusaavakka, paasisinnaavakka. Kisialli takusinnaasorivara oqaloqatigiittaqattaarnitsinni aaqqiissutissaq ornikkiartoripput. Taamaattumik toqqissisimaffigivara oqaloqatigiinnerit ingerlanerini aaqqiissutissaq nassaarissagipput, naalakkersuisoq, Peter Borg oqarpoq.

Nuannaarutigineqanngitsoq 

Nalunaarutigineqartorli innuttaasunit nuannaarutigineqanngilaq. 

- Uanga nammineq inuttut neriuuteqalersitsinertut taasinnaanngilara. Tusagaqannginnama ammatiinnarneqarnissaanut iliuuseqarnissamik, tunisassiorfimmik piginneqataasoq, Daaja Frederiksen oqarpoq.

Tunisassiorfik matussappat aalisartunuinnaq kingunerluuteqarnavianngilaq, inuussutissarsiortummi allat aamma eqqugaassapput. 

- Suliffeqarfiit aalisakkerivimmut attuumassuteqartut aamma eqqugaassapput, Daaja Frederiksen oqarpoq.

Tunisassiorfimmi sulisut taamaallaat eqqugaanavianngillat.

Akerliussutsimik takutitsinermi aaqqissuisut suliffeqarfiit allat sulisunik ikilisaanissaq, suliffeqarfiulluunniit matusariaqarneranik ernumassuteqarnertik pillugu oqaaseqaataannik akerliussutsimik takutitsinermi atuaapput.

Matuneqarnissaa aatsaat aalerinartorsiunngitsoq

Tunisassiorfiup matuneqaratarnissaa aatsaat siullermeertumik aarinartorsiunngilaq. 2005-imi aamma aarlerissutigineqarpoq, tamannalu illoqarfiup innuttaasuini ukiualuit qaangiunnerani malugineqarsinnaavoq, inuimmi 300-t missaanniittut Aasiaat qimappaat.

Sapaatip akunnerata naanerani akerliussutsimik takutitsinermi aaqqissuisup oqarnera naapertorlugu aalisakkerivik matuneqaqqissagaluarpat politikikkut erngertumik iliuuseqartoqartariaqarpoq.

Simigaq Heilmannip oqarnera naapertorlugu tamanna suliarineqarpoq:

-  Suleqatigiissitaq ataatsimeereernikuuvoq, naalakkersuisunullu assigiinngitsut arfinillit ataatsimeeqatiserinikuuagut. Masakkullu naalakkersuisut qaqugu ataatsimeeqatigisinnaanissaata ullulerneqarnissaa utaqqillutigu, borgmesteri oqarpoq.

Ataatsimiinnermi suna anguneqarsimanersoq borgmesterip eqqaanngilaa, naalakkersuisulli akisussaasup, Peter Borgip aalisakkeriviup atuutsinneqaannarnissaa naalakkersuisut sulissutigigaat oqaatigaa.