Polar Seafood: Aasianni aalisakkerivik matoratarsinnaavoq

Polar Seafood raajartassiissutinik saniatigut 4.000 tonsinik tunineqanngikkuni Aasianni tunisassiorfik, Polar Raajat matuneqaratarsinnaavoq.

Polar Seafoodip pisortaa, Bent Salling taama oqarpoq.

- Iliuuseqartoqanngippat Naalakkersuisuniit, tassa ukioq kaajallallugu fabrikkip ingerlasinnaanera qulakkeerneqarsinnaanngilaq, taanna oqarpoq.

Pisortap oqarnera naapertorlugu aalisarneq pillugu inatsit nutaaq pissutigalugu avataani aalisarnermit sinerissap qanittuanut nuussisoqarsinnaajunnaarnera kiisalu pisassat ukiuni kingullerni ikiliartornerat ajornartorsiutinut ilaatigut pissutaapput.

- Taamaalilluni tunisassiassat Aasiaat fabrikkiani ukioq kaajallallugu tunisassiornissamut naammakkunnaarnikuupput, Bent Salling oqarpoq.

Politikerit suliamik oqaluuserinninniartut

Polar Seafoodip Aasianni tunisassiorfiup matusussanngoratarnissaa kisimi ernumassutiginngilaa.

Kommune Qeqertalimmi Inuit Ataqatigiit kommunalbestyrelsimut ilaasortaasa suliamut tunngatillugu immikkut ittumik ataatsimiittoqarnissaa piumasaraat.

Kristian Jeremiassen (IA) taama oqarpoq.

- Borgmesterimut allagaqarpugut, immikkut ataatsimiinneq ingerlanneqartariaqartoq. Aningaasarpassuit suliffippassuillu pineqarput, taava matuneqarpat kommunimut assut sakkortuumik kinguneqassaaq.

Naalakkersuisunut suliassaq

Aasianni tunisassiorfik Polar Raajat 115-it tikillugit sulisoqarpoq. Suliffiullu ingerlaannarnissaa qulakkeerniarlugu Naalakkersuisunut saaffiginnittoqartoq, Bent Salling paasissutissiivoq.

Taannalu kisimiinngitsoq, Kristian Jeremiassen oqarpoq.

- Kommune Qeqertalimmi borgmesterimut allagaqarpugut immikkut kommunalbestyrelsi ataatsimiittariaqartoq, taava taamaalilluni kommunalbestyrelsi Naalakkersuisunut oqariartorsinnaaniassammat.

Borgmesterip Simigaq Heilmannip (D) immikkut ataatsimiittoqassappat paasissutissanik amerlanerusunik oqaloqatigiittoqaqqaarnissaanillu pisariaqartoq allakkatigut akissummini paasissutissiissutigaa.