- Eqqugaarujussuassaagut.

Polar Raajat Aasianni aalisakkeriviata matuneqaratarsinnaanera taama naatsigisumik ersaritsigisumillu nassuiaatigineqarpoq.

Kommune Qeqertalimmi borgmesteri, Ane Hansen aalisakkerivimmi sulisut 100-t missaanniittut aalisarnermut inatsit akuerineqassappat suliffissaarussinnaanerannik erseqqussumik nalunaaruteqartuuvoq.

Aalisarnermut inatsisissatut siunnersuutip sinerissap qanittuani aalisartunut pisassiissutinik annikilliiniarnera pissutaavoq. Tamannalu Polar Seafoodip Aasianni aalisakkerivimmik ingerlatsiinnarsinnaajunnaarneranik kinguneqartumik annikinnerusumik pisassiissuteqarfigineqartalernissaanik isumaqassasoq, Polar Seafoodip siusinneurusukkut oqaatiginikuuaa.

Akiligassaqaannassasoq

Niels Suliffimmik inuussutissarsiutinillu annaasartussaassasut ilagaat. Taanna Aasianni aalisakkanik suliffissuarmi tunisassiornermi pisortatut ulluinanrni sulisarpoq.

-  Aalassannarpoq, tupannarlunilu. Aalisakkeriviup matuneqarnissaa tusarluarnanngitsorujussuuvoq. Akiligassagut qanoq ilillugit akilissavagut, ineqarnerput qanoq ililluta akilissavarput?

- Aalisakkerivik illoqarfiup uummatigaa, tamannalu Aasiannut isertitatigut kingunerluuteqassaaq, illoqarfillu isasuussalluni, Niels Ole Kristiansen oqarpoq.

Aalisakkanik suliffissuaq matuneqaraluarpat, Niels Ole Kristensen, Aasianni allamik suliffissarsiorsinnaannnginnami, ilaquttanilu allamut nuuttariaqassapput.

Aalisakkerivik matuneqassappat ukiut pingasut ingerlanerani matuneqassaaq. Assi © : Pauli Wille / KNR

Aasiannimi eqqugaasunut tamanut suliffissamik pilersitsinissap angumerineqarnissaa piviusorsiornerunngitsoq, borgmesteri, Ane Hansen oqarpoq.

- Aalisakkerivimmi sulisut 96-it kisimik suliffimminnik annaasaqassanngillat. Tamanna Aaisanni aalisartunut kiffartuussinermillu suliaqartunut aamma eqquissasoq, taanna oqarpoq.

Allamik periarfissaqanngitsoq

Sulisut katillugit 120-usut aalisakkerivik pissutigalugu aalajangersimasumik suliffeqartinneqarput, matuneqassappallu tamanna borgmesterip oqarnera naapertorlugu kaaviiaartitanik 250 millionit koruuninik annaasaqaataassalluni.

- Naalakkersuisut inatsisartullu taakkua suliffiit paarlatsissaanik ukiut pingasut ingerlanerani eqqarsanngippata, uagut suliassaq taama sukkatigisumik suliarisinnaanavianngilarput suli suliffissat nutaat 120 pilersillugit.

Tamannalu nunatsinnut tamarmut kingunerluuteqangaatsiassasoq, Niels Ole Kristensen isumaqarpoq.

- Annaasalerujussuussaagut. Suliffeqarfimmi sulisuinnaanngitsut, Aasianniinnanngilaq, tamanna Kalaallit Nunaannut tamarmut eqquissaaq, allamut nuuttariaqarnissamik eqqarsalertariaqassaagut, Aasiaat qimattariaqalissavarput, taamalu nuanneq.

Meeqqat naligiittut pinnguarluarnerusartut

Niels Ole Kristensenip aalisarnermut inatsisissaq illuaarsiortuusorlugulu Royal Greenland allanit iluaqutisserneqarnerusoraa.

Isornartorsiuinerlu taanna uteqqiavoq. Taassuma politikerit sooq aalisakkerivimmik ingerlalluartumik matusiniarnerat paasisinnaanngilaa.

- Aalisakkeriviit suliffeqarfiillu assigiimmik iliuuseqarfigineqassasut isumaqarpunga. Suliffeqarfik kalaallinit pigineqartoq sooq iluaqutisserneqarnissaa paasisinnaanngilara.

Niels Ole Kristensen aalajangiisinnaagaluaruni Aasianni aalisakkerivik ammatiinnarneqassaaq, taassumalu naalakkersuisut aalajangiiniarnerat kukkunerusoralugu isertuunnagu oqaatigaa.

Taassuma ilaqutaatalu siunissaat qanoq iluseqarumaarnersoq suli nalunarpoq. Inatsimmi suli akuerineqanngilaq. Aalisarnermut inatsisissaq sisamanngornermi pingajussaaneerneqarlunilu taasissutigineqassaaq.