Aalisarnermut inatsisissaq isornartorsiorneqangaatsiartoq oqaluuserineqalerpat naalakkersuisut naalakkersuisoqatigiillu partiivineersut akornanni oqallittoqangaatsiarnissaa ilimagisimagaanni taamaanngilaq.   

Politikerimmi Inuit Ataqatigiinneersut Siumumeersullu eqqissisimalluinnarput.  

Taamaattumik inatsisissatut siunnersuut Inatsisartut ataatsimiittarfianni naggataarutaasumik taasissutigineqartigani aalisarnermut ataatsimiititaliamut suliassanngortinneqaqqissasoq ilimanarluarpoq.

Naalakkersuisoqatigiit partiivineersut inatsisissap akuerineqarnissaa pisariaqarnerarlugu ullup ingerlanerani uteqattaarpaat. Nutaamimmi inatsiseqalerneq aalisartut atugaasa nutarterneqarnissaannut pisuussutillu inunnut amerlanerusunut iluaqutaalernissaanut aqqutissiuissaaq.

- Nunatsinni inuussutissarsiutit pingaarnersaata inuiaqatigiinnut atugarissaarnitsinnullu iluaqutaanissaa anguniarlugu pitsaanerpaamik inatsisiliorusuppugut, aalisarnermut naalakkersuisoq Kim Kielsen ataatsimiinnerup aallartinnerani oqarpoq.

Aalisarnermut ataatsimiititaliap siulittaasua IA-meersoq, Kristian Jeremiassen, aamma taama isumaqarpoq.

- Tassa tamakkiisumik isiginnilluni piujuartitsineq tunngavigineqassasoq - aamma aalisarnermi pisuussutinillu atuinerni tamani avatangiisitigut, inooqatigiinnikkut, kultuurikkut aningaasarsiornikkullu piujarsinnaasumik tunngaveqartoqassasoq.

Nunani allamiut ingerlatseqatigiiffii pinnagit kalaallinik salliutitsineq  

Nunatsinni aalisarnermik inuussutissarsiuteqarnermi allamiut aalisarnermik ingerlatseqatigiiffii pissaaneqarpallaarunnaassapput. Nunattami imartaani aalisarneq kalaallit aalisartuinit siunissami ingerlanneqassasoq Inatsisartuni amerlanerussuteqartut isumaqarput.  

- Aalisakkat kalaallit inuiaqatigiinnit pigineqarput. Pisassiissutit innuttaasunit pigineqarput. Taamaattumik nunatsinni ingerlatseqatigiiffiit taassaassapput aalisarnermik ingerlatsisussat. Nunat allamiut ingerlatseqatigiiffiinut immikkut akuersissuteqartarneq unissaaq. Nunaqavissut piginnittuussapput, Kristian Jeremiassen oqarpoq.

Siumup aalisarneq pillugu oqaaseqartartua, Karl Tobiassen, oqaluttarfimmiinnermini oqarpoq nunatsinni aalisarnermik ingerlatseqatigiiffissuit Royal Greenland Polar Seafoodilu aalisarnermik inuussutissarsiuteqarnermi ingerlatsinikinnerulissasut.

- Nunatta aningaasaqarnera ingerlatseqatigiiffissuarnit marlunnit nammanneqarsinnaanngilaq. Pisassiissutit aalisartunut amerlanerusunut iluaqutinngortinneqassapput. Nammineernissaminnut piumassuseqarput, bankiniit aningaasaliisartuniillu ikiorneqarnissaannut aqqutissiuussissaagut, Karl Tobiassen oqarpoq.   

Polar Seafoodip ingerlatseqatigiffittut angivallaalersimaneranik isumaqartoqassappat paasisinnaagitsik ingerlatseqatigiiffimmit oqaatigineqareerpoq. Aalisarnermulli inatsisissaq akuerineqassappat kommuneni sulisunut kinguneqassaaq.

- Suliffiit nunatsinniittut attavaartissinnaananavianngilagut. Tamannalu kommuninut aalisakkeriveqarfigisatsinnut annertuumik kinguneqassaaq, Polar Seafoodip pisortaa Bent Salling oqarpoq. 

Illuatungiliuttut naalakkersuisut namminissarsiorneraraat

Naalakkersuisut aalisarnermik inatsisissaq inuiaqatigiinnut aalisarnermullu inuussutissarsiornermut iluaqutaassaneraraat, illuatungiliuttut akerlianik isumaqarput.

Naalakkersuisummi immikkut ilisimasallit aalisartullu aarleqquteqarlutik isornartorsiutaannik tusaajumasimannginnerarlugit illuatungiliuttut tamarmik isornartorsiuipput.

Naalakkersuisulli nammineerlutik inatsisissamut oqaaseqaataani qupperneq 33-mut qupperaanni, siunnersuut sulisoqarnikkut ukioq naallugu sulisut 480-it missaannut naapertuuttumik ikilinerinik kinguneqassasoq allassimavoq. 

Tamannalu Demokraatit siulittaasuata Jens-Frederik Nielsenip oqallinnermi arlaleriarluni oqaaseqarfigaa.

- Naalakkersuisut namminneerlutik allapput, inuiaqatigiinnut annertuumik kinguneqartussaasoq aningaasatigut aamma suliffissaqarniarnikkut. Nassuerutigineqarpoq, siunnersuut suliffinnik akeqassasoq, taanna oqarpoq.

Inatsisissatut siunnersuut pilersaarutit malillugit sisamanngornermi maajip 16-ni pingajussaanik oqaluuserineqassaaq.