Polar Seafoodip suliffeqarfiutaa nutaaq millionilinnik sinneqartooruteqartoq

Polar Seafoodimit tamanna pillugu annerusumik nalunaaruteqartoqanngilaq.

Aalisakkerinermilli suliffeqarfissuup ingerlatsivik avinniarlugu 2025-mi aalajangerpaa, suliffeqarfik taamaalilluni Polar Seafood A/S-imit aamma pilersinneqaqqammersumit P49-mit pigineqarluni.

Suliffeqarfinnik nalunaarsuivik naapertorlugu P49 ukioq manna marsimi aatsaat pilersinneqarpoq, Polar Seafoodilli oqarnera naapertorlugu ingerlatsivik siorna avinneqarpoq:

- Polar Seafoodip suliffeqarfimmini ingerlatsivik Polar Seafoodimut aamma P49-mut 01/01-25 avippaa, Polar Seafoodimi piginneqataasoq attaveqaqatigiinnermullu akisussaasoq, Polar Seafoodimi aqutsisut allakkatigut akissuteqarluni oqarpoq.

P49-p 2025-mi naatsorsuutit nutaat saqqummiuteqqammerluinnarpai.

Uanilu ingerlatsivik akileraaruteqareernermi 37,3 millionit koruuninik ukiumut sinneqartooruteqartoq allassimavoq.

Piginittut taakku, ingerlatsivik nutaaq

Ingerlatsivik nutaaq P49 Polar Seafood A/S-itulli Bent Friis-Sallingimit, Laila Friis-Sallingimit, Miki Jonas Brønsimit soraarnerussutisiaqartitsivimmiillu SISA-mit pigineqarpoq.

Ingerlatsivinni taakkunani siulersuisut aamma taakkuupput.

P49-lli Polar Seafoodip Sigguk A/S-imut aamma Qajaq Trawlimut piginneqataassutaa pigilerpai.

KNR-ip aalisakkerivissuaq P49-mik sooq pilersitsiniarsimanersoq ingerlatsivimmilu suna siunertaanersoq Polar Seafoodimut apeqqutigaa.

- Aaqqissuussaanermut niuernermullu tunngasut pillugit taamaaliorpugut. Polar Seafood sammisanik niuernernilluunnit immikkut ukkatarinninnialeraangami suliffeqarfiup ataani ingerlatsivinnik imaluunniit ingerlatsivinnik nutaanik pilersitsisarnera nalinginnaalluinnarpoq. P49-mullu atatillugu aamma taamaattoqarpoq, aqutsisut oqarput.

Polar Seafood A/S-ip 2025-mut naatsorsuutini saqqummiuteqqammerpai. Aalisakkerivissuarlu akileraannginnermi 236 millionit koruunit sinnerlugit sinneqartooruteqartoq tassani allassimavoq.

Angusat 2024-mi angusanit 141 millionit koruuninik sinneqartooruteqarfiuneroreersut ingerlatsivik P49-mut avinneqarsimanngikkaluarpat suli amerlanerusimasinnaagaluarpoq.

Pisassiissutinik neqerooruteqartitsinissamut attuumassuteqanngitsoq

Naalakkersuisut pisassiissutinik neqerooruteqartitsineq qinnuteqartoqarpallaannginnera, eqimattat ikittuinnaat inuiaqatigiinni naleqartuniinnissaat Aasiannilu suliffissanik annaassiniarnissamut pilersaaruteqartoqannginnera pissutigalugit taamaatinniarlugu juulip aallartinnerani aalajangerpaat.

Taarsiulluguli neqerooruteqartitsinerit nutaat marluk aallartinneqarpoq, aappaanilu Aasianni suliffissanik qulakkeeriniarneq immikkut pingaaruteqartinniarneqarluni.

Carl Christensenip aalisartorsuup aamma Qaleralik A/S-imi pisortap neqerooruteqartitsineq nutaaq aamma P49 isornartorsiungaatsiarpai:

- Pisumi matumani ingerlatseqatigiiffiup nutaap P49-p, Polar Seafoodip aalisarnermut inatsimmi pisassat amerlanerpaaffissaat avaqqunniarlugu pilersissimagunagaata, Naalakkersuisunit aalisagarpassuarnik pisassiivigineqarsinnaanngorlugu ilusiligaanera aarlerinarnerpaavoq, taanna Sermitsiamut oqarpoq.

Polar Seafoodip oqarnera naapertorlugu ingerlatseqatigiiffik nutaaq pisassiissutinik neqerooruteqartitsinissamut attuumassuteqanngilaq.

- P49-p pilersinneqarnera pisassiissutinik neqeroortitsinissamut attuumassuteqanngilaq. P49 neqerooruteqartitsisoqartussanngornissaanik ilisimasaqannginnitta nalaani pilersinneqarpoq, Polar Seafood oqarpoq.

Neqerooruteqartitsinermut nutaamut qinnuteqaateqarnissaq juulip 24-anni tallimanngornermut killeqarpoq.