Inuiattut ataatsimik erinarsuuteqarnissarput Atassutip siulittaasuata Aqqalu C. Jerimiassenip anguniagaasa ilagaat. 

Upernaakkut ataatsimiittoqarnerani oqallisigineqartussatut siunnersuutigaa, Inatsisartunilu pingasunngornermi siullermeerneqarpoq. 

- Inuiattut erinarsuut inuttut ataatsimoorfigisarparput. Nunatsinni ataatsimoorfissaraarput nunatullu nunanut allanut ilisarnaatigalugu, Aqqalu C. Jerimiassen oqalugiartarfimmit oqarpoq. 

Taassuma naalakkersuisut inuiattut erinarsuut pillugu aalajangiisoqarsinnaaneranut periarfissanik assigiinngitsunik saqqummiussinissaat siunnersuutigaa. 

 ‘Nunarput utoqqarsuanngoravit’ aamma ‘Nuna asiilasooq’ tamarmik ullutsinni erinarsuutigineqartarput. Atassulli nutaavimmik inuiattut erinarsuusiortoqassanersoq misissorneqartariaqarsoraa.

Oqallinneq tamanna eqikkaanermi matumani paasisaqarfiginerusinnaavat. Aallarnisunut nersornaasiineq nutaaq aamma sammissavarput. Atuarluarisi.

Inuiaqatigiit taasitsinneqarnissaat

Naalakkersuisut inuiattut erinarsuut pillugu erseqqissaanissap pisariaqarnera Kultureqarnermut naalakkersuisup, Nivi Olsenip (D), Inatsisartuni pingasunngornermi oqallinnermi oqaluttuaraa.

Taakkua inuiattut erinarsuut pillugu taasisitsisoqartariaqarsoraat. 

-  - Inuiaqatigiit taasitinneqarnissaat inuiaqatigiit tapersersugaannik inatsisissatut siunnersuusiornissamut siunertaavoq, Nivi Olsen oqalugiartarfimmit oqarpoq.

Inatsisartuni partiit tamarmik inuiattut erinarsuummik toqqaanissamut innuttaasunik taasisitsisoqarnissaa aaqqiissutissaqqissuusoraat.

- Aalajangiineq innuttaasut namminneq isumaat tunngavigalugu aalajangiinerussammat innuttaasut peqataatinneqarnissaat Siumumit pingaartipparput, Lars Poulsen Siumumeersoq oqarpoq. 

Kalaallit Nunaanni inuiattut erinarsuut sorleq atorneqassanersoq Inatsisartuni aatsaat eqqartorneqalinngilaq. Tamanna 1979-imi, 1990-imi, 1992-imi, 1994-imi, 2000-imi, 2002-mi, 2003-mi 2017-imilu pivoq.

Siunnersuulli ataatsimiititaliani suliaqartunut inuiaqatigiinnit taasissutigineqarsinnaaneranik periarfissaq misissorneqarnissaa allannguutissatut siunnersuutigalugu tamatumuuna ingerlateqqinneqarpoq.

Aallarniisunut nersornaasiineq

Aallarnisunut ukiut tamaasa nuna tamakkerlugu nersornaasiisoqartalernissaa demokraatinit pingasunngornermi aamma siunnersuutigineqarpoq. 

- Aallarnisaanerup ersarinnerulersinneqarnissaa, aallarnisaanissamullu amerlanerusut isumassarsitinneqarnissaat siunertaavoq. Unammisitsinermi taamak ittumi aallarnisaasut isumassarsiaminnik, suliffeqarfimminnik, nutaaliaasumillu aaqqiissutiminnik saqqummiinissaannut periarfissiisinnaavoq, Napaartoq Isak Petrussen (D) oqarpoq. 

Naalakkersuisut isumassarsiaq itigartinngilaat, taamaattorli aallarniisut saqquminerutikkumallugit inuit namminneq suliniuteqartarnerat erseqqissaatigaat.

- Naalakkersuisut taamaammat isumaqarput, nuna tamakkerlugu Nersornaasiisarnermik pilersitsisoqarnissaa sulissutigineqartariaqartoq, tamatumunngali peqatigitillugu inuussutissarsiutinik siuarsaanerup aallarnisaasarnerullu iluini sulisooreersunik suleqateqarluni tamatuma pilersinneqarnissaa periarfissaasariaqartoq isumaqarlutik, inuussutissarsiornermut naalakkersuisoq, Muté B. Egede taama oqarpoq.  

Siunnersuut ataatsimiititaliani suliaqartunut ingerlateqqinneqareerpoq.

Inatsisartuni nakorsiartut pillugit paasissutissanik qarasaasiatigut nalunaarsuiffissap kalaallisut tuluttullu qanoq atorneqalersinneqarnissaa, qanorlu peqqinnissaqarfimmi piffissaliussap qaangiutinnginnerani misissorneqarnissamut nakorsarneqarnissamullu pisussaaffiliisoqarsinnaanera pingasunngornermi aamma oqaluuserineqarpoq.