Namminersulivinnissaq Partii Naleqqap anguniagarissavaa
Politikerit Partii Inuimmiissimasut Partii Naleqqami apriilip 24-ani qinigassanngortissapput. Tamanna Partii Naleqqap siulittaasuata, Hans Enoksenip, aamma Partii Inuinnik pilersitsisup, Nikku Olsenip, tusagassiortunik tallimanngornermi naapitsinerminni uppernarsarpaat.
- Partiimi isumaqatigiissutigut tassaapput kattutissalluta ataatsimeersuassalluta anguniakkagut nutartissallutigit naleqartitagullu tamaasa nalilersorlugit aamma ingerlariaqatigiissalluta. Taanna isumaqatigiissutigivarput, taanna alloriarfigaarput, Nikku Olsen taama oqarpoq.
Erseqqissarlugulu qinersinissami sassaqqinnissani:
- Aap, qineqqusaassaanga. Soorunalimi piareersimavunga aamma naalakkersuinermi suleqataaniarnermut pingaartitagut aamma anguniakkagut sulissutigeqqissallugit.
Nnamminersulernissaq Partii Naleqqap anguniagarigaa, siulittaasup Hans Enoksenip oqaatigaa:
- Pingaartitatta ilagilluinnarpaat nuna naalagaaffik Kalaallit Nunaat qineqqusaarutigissallugu. Naalagaaffimmik pilersitsinissarput annertuumik aamma politikkitsinni inissisimavoq, taassumalu aamma saniatigut innuttaasut atugaasa naligiinnerulernissaat minnerunngitsumillu aamma inuussutissarsiornikkut, ilinniartitaanikkut, isumaginninnikkut, utoqqaat, meeqqat, nunaqarfiit isorliunerusut allarpassuillu tassani aalluttussaavagut. Qineqqusaarnissatsinni illersortakkagu taakkua nalornissanngillat illersorneqarnissaminnik,
Nunatta 2021-mi nammilersulersimanissaa Hans Enoksenip suli anguniagaraa:
- Ukiuni arlalinni taanna oqaatigisaqattaarparput, kisianni aamma nassuerutigissavarput uagut partii mikisuarannguugatta imaaliinnarlugu anguniarnissaa ilungersunassaaq. Kisianni ukiumik taasereernikuuvugut, partiit allat erseqqissumik oqarnikuunngillat tunuarterpasipput pisinnaanngorutta. Qaqugu pisinnaanngorneq takkutissagami? Uffa nalunagu uagut nammineq aaqqissuuttussaallugu, Hans Enoksen oqarpoq.
