Ittoqqortoormiit: WWF innutasuunik nannunillu illersuinermi nutaami periuseqalisaaq

WWF-ip nannut Ittoqqortoormiini illoqarfimmut qanillattortinnaveersaarnissaannut imassaliat gumminik aqerlortaasallit sakkortunerusut atorneqalersikkusuppai.

Ittoqqortoormiini innuttaasut nannunut illersorniarlugit atortussat sakkortunerusut atorneqartariaqarput.

Ittoqqortoormiini eqqaannilu inuit nannullu ukioq manna marloriarlutit imminnut qanillivallaarput.

Taamaammat illoqarfiup eqqaani nannunut nakkutilliisuutitat, ilaatigut meeqqat isumannaatsumik atuariarsinnaanissaannik qulakkeerinnittussat ukioq manna aallartiaarput.

- Uunartimi inuk nannumit saassunneqareersorli illoqarfiup eqqaani nanoqartorujussuusoq paasigatsigu, apriilip qeqqani nannunut nakkutilliisut upernaami nakkutilliisutut aallartinniarlugit aalajangerpugut, taamaaliunngisaannarsimagaluarpugullu, WWF Nuummi siulittaasoq, Kaare Winther Hansen oqarpoq.

AAMMA ATUARUK Piniarnermut nakkutilliisoq nannumit saassunneqangajalluinnartoq

Aqerlortaasat naammakkunnaarput

Nakkutilliisut nannut tungaannut qamuteralannik ingerlaannarnerat ilaanni naammattarpoq, ilaannili sakkussat sakkortunerulaartut atorneqartariaqartarput.

- Imassat gummimik aqerlortaasallit iluatsilluartumik atorpagut, taakku inunnut illersuiniarnermut nannullu amerlavallaat pisariinnannginnissaannut aqqutissaapput.

Imassalli gummimik aqerlortaasallit naammakkunnaarmata periutsinik nutaanik ujartuisoqartariaqarpoq.

- Atortorissaarutinik arlalinnik atulersinnaasaqarpugut. Imassanik gummimik aqerlortasalinnik sakkortunerusunik atuinissamut akuersissuteqarniarsarivugut, taakkulu misileraleruttorpagut. Alaskami taakku misilittagaqarfigineqarluarput. Tassalu  tatamisinniarnissaannut sakkussagissaarniarsarivugut, maannami atortorissaarutit pitsaanerpaat atortariaqarpagut. Siornatigut tatamisinniarlugit eqqarneq naammattarnikuugaluarpoq, Kaare Winher Hansen oqarpoq, allanillu aamma sakkussaqalersinnaallutik oqaluttuarluni.

Malussarniutit nannunik kalerrissaarisassapput

- Ukioq manna misilerarneqarlereersinnaassasoq tassaavoq kalerriingasuartaat, taanna Ittoqqortoormiini aallartissinnaassallugu neriuutigaarput.

AAMMA ATUARUK Jan 56-inik ukioqartuusoq Uunartimi nannumik saassutsittoq

Kalerriingasuartaat taanna qimminik, inunnik nannunillu immikkoortitsilluni malussarsinnaavoq, taannalu illoqarfiup nanoqarneranik innuttaasunik kalerriilertortassaaq.

Ukioq manna taama siusitsigisumik nannunut nakkutilliisoqalerneranut pissutaasup aappaaraa nannut illoqarfimmut qanillivallaartut pisarineqarnissaat qajassuuttariaqarmat. Nannunimmi aatsaat pisariaqavippat pisaqartoqarsinnaavoq.

- Ittoqqortoormiini upernaaq manna nannut nalinginnaasumit amerlanerujussuusut takuarput.

AAMMA ATUARUK Nannuttassiissutit Ittoqqortoormiini tamakkerneqarput