Jan 56-inik ukioqartuusoq Uunartimi nannumik saassutsittoq

Jan-ip nunaqarfik alliartorfigisimasamini innaallagissiuut orseriartuinnaraluarpaa, innaallagissiuut illuaqqamiittoq immereerlugu anillallunilu pileriallarpoq nanoq imminerminit taavaana 10 meteriinnarnik ungasitsigisumiilereersoq.

-Taava nanorsuaq tungiinnavinnut aallartupalaarsuuvoq, jan lorentzen pisup aqaguani knr-imut taamatut oqaluttuarpoq.

Qoorortuunimi ulloq taanna nassanngilaa qamuteralaallu aamma 10 meterit missaani ungasitsigisumiillunittaaq.

-Nanoq unissarniarlugu nivaataq tigummiara tungaanut milorujuppara.

Nanorli unikaallannani Jan-i qamuteralamminut qimaarsuataartup tungaannavianut ingerlaannarpoq.

- Tikilluinnarmanga tilloriaqaara asulu niaqorsuatigut toqqiginga. Pingasoriarlugumi niaqorsuatigut tilluppara ataasiarlugulu alleruatigut eqqorlugu, tassalu qamuteralannut apuutillarlunga.

Nanoq Jan-ip tilluarsimanngitsuuppagu kiitissimanissani qularinngilaa.

- Kiinngitsoorpaanga, misiliigaluarpormi. Jan oqaluttuarpoq.

Angut 56-inik ukiulik Illoqqortoormiuni ulluinnarni orsiivimmi sulisuuvoq ataataasuusorlu qamuteralani aallartinniariarai nanoq saassussisoq nipimik allassarluni tunuartiimivoq.

AAMMA ATUARUK Nannut kaattut inoqarfinnut qanilliartuinnassapput

Taamaasiniariartoq Jan tamannguat qimaalluni aallarsarpoq, nanorsuulli pinialikkani persariniinnarpaa.

- Pangalilluni malersoraluarpaanga, qamuteralaalli sukkavallaarlutik.

Jan Lorentzen Uunartimi, qallunaatut Kap Tobin-imi inunngorsimasuuvoq. Taanna inersimasuunini tamaat ilaquttanilu Illoqqortoormiuni najugaqartuupput. Nannut Illoqqortoormiuni Uunartimilu ulluinnarsiutaagaluarput. Nannulli amerlanerit inunnik siumuigaangamik ingerlaannaq qimaasaraluarput. Jan oqaluttuarpoq.

Misigisaq avaanngunartoq misigeriillarlugulu Jan-ip Illoqqortoormiuni piniartoq ilisarisimasani oqarasuaatikkut attaveqarfigaa.

- Taanna minutsit 10-15-t qaangiutiinnartut takkuppoq nanorlu pisaralugu.

Jan-i ataasinngormat misillereerlunilu angerlarmat eqqarsaaterpassuit sarsuatilerpai.

- Misillersimanermut timikassanga kingunerlutsitsilluni sajuttupilussuanngorpoq. Misigisarmi avaanngunaqaaq.

Misillertitaasimaninili nunaqarfigisimasaanukaqqinnissaanut avaarsaatiginngilaa. Aqaguanimi marlunngornermi piniartut ilagalugit Uunartiliaqqeriikatappoq.

- Massakkorpiaq Uunartimiillunga oqarasuaatikkut oqaluuppakkit. Allamik nannuttoqaqqammerpoq illummalu silataani pilaleruttorlutigu. Jan taama naggasiivoq.

AAMMA ATUARUK Nannut tallimat ullormut aallaaneqartut

AAMMA ATUARUK Henriup nanoq illuminit 25 meterisut ungasitsigisoq aallaasariaqarsimagaa