WWF: Nannut kaattut inoqarfinnut qanilliartuinnassapput

Nuna tamakkerlugu nannut qanillattortut qulingiluat 2007-mi nalunaarsorneqarput. Nunarsuaq tamakkerlugu pinngortitaq pillugu suliniaqatigiiffiup nannunik nakkutilliisuisa kisitsisaataanni tamanna allassimavoq.

Issittumi inoqarfinnut nannut qaninngoortut ukiuni aggersuni ikiliartornissaat ilimanaateqanngitsoq, suliniaqatigiiffik isumaqarpoq.

AAMMA ATUARUK Nannut pillugit iliuutsit naammanngillat

Silap pissusaata allanngoriartornerata kinguneranik imaata sikua milligaluttuinnartillugu nannut kaallutik inoqarfinnut qaninngoortut amerliartuinnartut, suliniaqatigiiffimmi qullersaq Bo Øksnebjerg oqarpoq:

- Nalornisiginnilluinnarpara taama pisoqartarnera ingerlaannassasoq.

- WWF-ip nannunik nakkutilliisuutitaasa nannunik naapitsisoqannginnissaa qulakkeerniartussaavaat, Ittoqqortoormiini nanorsiortoqarneri tamangajaasa taakku aggeqquneqartarsimapput.

Nannut illoqarfimmut qaninngoortut taakku sioorasaarlugit qimaatittarnissaat suliassaraat. Nannumimmi naapitsineq ajortorujussuarmik kinguneqarsinnaasoq, Bo Øksnebjerg oqarpoq.

- Kialuunniit nannumik kaattumik naapitsinissaq kissaatiginngilaa, nerisaassagamimi.

- Taamaammat ajornartorsiulertoqartinnagu inoqarfinnut pitinnagit qimaatittariaqarpagut, suliniaqatigiiffimmi qullersaq oqarpoq. 

Nannut nalunaarsorneqartutut 21-riarlutik Ittoqqortoormiinut qaninngoornerini inunnik ajoqusertoqarsimaneranik nalunaartoqarsimanngilaq. 

WWF-ip nannunik nakkutilliisuutitaasa nalilerpaat nannut piffissami tassani nalunaarsorneqartutut 21-naasimanissaat ilimananngitsoq, amerlanerit takuneqaratik qaninngoorsimasinnaasut taakku ilimagaat.

/ritzau