WWF: Nannut pillugit iliuutsit naammanngillat

Nunat nanoqarfiusut nanoqassutsimik paarsinissamut iliuuserisaat naammanngillat. Nunarsuaq tamakkerlugu pinngortitaq pillugu suliniaqatigiiffiup nalunaarusiaani nutaami tamanna atuarneqarsinnaavoq.

Nannut piujuaannarnissaat qulakkeerniarlugu suliniutissat arlallit ukiut qulit iluanni aallartisarnissaat pillugu nunat tallimat 2015-imi isumaqatigiissuteqarput.
 
Maannali ukiut marluk qaangiunnerini anguniakkat taamaallaat 5 procentii naammassineqarsimapput.
 
- Naammaginannilaq. Tamanna qularutissaanngilaq, Nunarsuaq tamakkerlugu pinngortitaq pillugu suliniaqatigiiffiup Nunatsinni allaffianeersoq Kaare Winther Hansen taama oqarpoq.

AAMMA ATUARUK Nannut pillugit iliuusissiaq isumaqatigiissutigineqalersoq

Circumpolar Action Plan, immikkoortuni anguniakkanik ukiut qulit iluanni naammassisassanik 62-inik imaqartoq, Canadap, USA-p, Ruslandip, Norgep Nunattalu Ilulissani 2015-imi atsioqatigiissutigaat.
 
Anguniakkanut tunngatillugu nunat killiffiinik nalunaarsuiffimmik WWF suliaqarsimavoq. Nalunaarusiarlu naapertorlugu Nunarput anguniakkamigut agguaqatigiissillugu qaffasinnerit akornanniippoq.
 
- Naliliinerput naapertorlugu uuliakoortoqarsinnaaneranut upalungaarsimaniarnerup qulakkeerneqarsimannginneranut aamma tunngassuteqarpoq.

AAMMA ATUARUK Nannut tallimat ullormut aallaaneqartut

Qaninngoortut iliuuseqarfiginissaat pikkorinneruffiginerusariaqarpoq

Nannut inoqarfinnut qaninngoortut iliuuseqarfiginissaat aamma pikkoriffiginngikkipput Kaare Winther Hansenip erseqqissaatigaa.  
 
Nannummi qimaatinnagit aallaaneqartarput, tamannalu aaqqiissuteqarfigineqartariaqarpoq.
 
- Naalakkersuisut tungaannit suliniuteqanngilaq. Nannunik nakkutilliisussanik pilersitsisoqanngilaq aamma piniarnermik nakkutilliisut gumminik imassalianik atuinissaat eqqunneqarsimanngilaq, Kaare Winther Hansen taama oqarpoq.
 
Nunarsuaq tamakkerlugu pinngortitaq pillugu suliniaqatigiiffiup Ittoqqortoormiini nannunik nakkutilliisoqartitsineq misilittagaqarfigilluarpaa, nannummi arlalissuit aallaanagit qimaatinneqartarsimapput.

AAMMA ATUARUK Nanoq kaattoq nannunit ikiliartortuneersuusoq

Imaata sikua milligaluttuinnartillugu nannut illoqarfinnut nunaqarfinnullu qaninngoortut amerliartuinnassapput, taamaammat WWF isumaqarpoq nannunik nakkutilliisussanik amerlanerusunik siunissami pilersitsisoqartariaqassasoq.
 
Nunarpulli aamma nersualaarneqarpoq. Baffinnimmi kangerliumarngani piujuaannartitsinissamik tunngaveqarluni nannunniarnissaq pillugu Canada isumaqatigiissuteqarfigineqarpoq Tunumilu nannunik kisitsineq aamma aallartinneqarsimalluni.
 
- Tunumi nanoqassuseq ilisimalerutsigu Kalaallit Nunaat tamakkerlugu piujuaannartitsinissamik tunngaveqarluni nannunniarneq siullerpaamik eqqussinnaalissavarput.
 
Nunarsuaq tamakkerlugu pinngortitaq pillugu suliniaqatigiiffiup Nunatsinni allaffianeersoq Kaare Winther Hansen taama oqarpoq.