Nanoq kaattoq nannunit ikiliartortuneersuusoq
Nanoq videoliamiittoq sooq kaannersoq paatsuugassaanngitsumik oqaatigissalluni ajornakusoorpoq. Nannut amerlassusaat unammillernarpoq, Pingortitaq pillugu nunarsuaq tamakkerlugu suliniaqatigiiffik Pinngortitaleriffillu taama oqarput.
Nannut uku silap pissusiata allanngoriartorneranit sunnerneqarput, Pinngortitaleriffimmit, Fernando Ugarde oqarpoq.
Taassuma naliliinera pingortitaq pillugu nunarsuaq tamakkerlugu suliniaqatigiifimmit, WWF-imit Kaara Winther Hansenimit taperserneqarpoq.
- Piffimmi tassani nannut misissorneqaqqammerput, tassani nannut oqiliartortut takutinneqarpoq, nannut sivisuumik nerisaqarnatik inuunissaannut oqimaassuseq taanna pingaaruteqartorujussuuvoq.
AAMMA ATUARUK Peberspray og gummikugler skal holde isbjørne væk
Baffinip Kangerliumarngani nannut amerlassusaat naatsorsuinermi kingullermi 2800-it missaanniipput. Kisitsisit qularnartillugit nannut ukiuni kingullerni amerlisimanersut ikilisimanersulluunniit oqaatigissallugu ajornakusoorpoq.
Qularnanngilarli nannunut atugassaritinneqartut sunnerneqarput tassa Baffinip kangerliumarngani sikukinnerulerpoq, 1990-ikkunnullu sanilliullugu ukiumi sikusarnera sapaatit akunnerinik arlalinnik sioqqutsilluni aattartoq, Winther Hansen oqaatigaa.
- Maannali nannut salunnerusut takuavut, taamaammat inuuneqqortussusaat sivikinnerulerpoq. Taamaammat nannut allat ima salutsigineri takusassavagut, Kaare Winther Hansen oqarpoq.
AAMMA ATUARUK Henriup nanoq illuminit 25 meterisut ungasitsigisoq aallaasariaqarsimagaa
Fernando Ugartep nannut ilarpassui Qeqertaalummut qularnanngitsumillu nunatta avannaanut Kane Bassinimullu ukiorpassuarni suli sikuusussanut siunissami nuukkumaartut nassuiaatigaa.
Piffimmi tassani nannut ullumikkut 400-it missaanniipput, ukiulli 30-t 50-illu akornanniittut qaangiuppata tamanna Issittumi nanoqarfissuanngorumaarpoq.
- Nunatta avannarpasissua, canadamiullu Issittumi qeqertaalui, Qaanaaq nunattalu avannaa siunissami nanoqarfiunerpaalissasut naatsorsuutigaarput.
Fernando Ugardep nannut kaallutik toqusarnerat nalinginnaasuunerarpaa. Qeqertaalummili nannut inuunerannut atugassarititaasut allannguuteqarujussuanngippata nannut ukiukinnerullutik toqusarnerat siunissami qaqutigoortuujunnaassaaq.
AAMMA ATUARUK Silap kissatsikkiartornera nannunut aarlerinartoq
