Vittus Qujaukitsoq: Isumaga allanngunngilaq
Taamaattoq nunani tamani niuffannermi akigitinneqartut nunatsinni akigititanut aamma aallaavigitikkusuppai.
Uuliamulli akigititat PolarOilimit aalajangerneqartartut paragraf 37 naapertorlugu apeqquteqaammut akissummini aasaq allappoq.
Aamma PolarOilip Namminersorlutik Oqartussallu kiffartuussinissamut isumaqatigiissutaat aallaavigalugu uuliamut akissat naatsorsorneqartartut Vittus Qujaukitsoq nassuiaavoq.
Aamma atuaruk Polar Oilip akinik nalimmassaaniarnera akuerineqarnikuunngilaq
Taamaakkaluartoq Vittus Qujaukitsup isummani allanngorsimannginnerarpaa.
- Isumaga allanngunngilaq. Akinuku allannguuteqartut, akikilliartorlutik, Vittus Qujaukitsoq KNR-imut oqarpoq.
Uuliamut akit PolarOilimit aalajangerneqartarput
Suliffeqarnermut naalakkersuisup, Randi Vestergaard Evaldsenip, decembarip naalernerani allataanut taamaasilluni akerliliivoq.
Tassami Evaldsen paragraf 37 naapertorlugu apeqquteqaammut akissummini allappoq, uuliamut Nunatsinni akit PolarOilimit aalajangerneqartartut.
Aamma atuaruk Uuliap akia apparaluttuinnarpoq
Naalakkersuisunullu ilaasortat marluk assigiinngitsunik oqaaseqarnerat Inuit Ataqatigiinninngaanneersumit Naaja Nathanielsenimit tupaallaatigineqarpoq.
- Paragraf 37 naapertorlugu apeqquteqaammut Randi Vestergaard Evaldsen Jens Immanuelsenimut ungasinngitsumi akissuteqarpoq, tassanilu ersersinniarlugu, uuliamut akigititat PolarOilimit aalajangerneqartartut.
- Vittus Quajukitsorlu upernaami 2015-imi assinganik aamma allappoq. Taamaammat allamik isumaqartoqaleriasaarsimasoqarnera eqqumiitsorujussuuvoq, Naaja Nathanielsen KNR-imut oqarpoq.
Uuliap akia inuiaqatigiinnut sunniuteqartorujussuuvoq
Vittus Qujaukitsulli erseqqissarpaa, uuliap akia inuiaqatigiinnut sunniuteqartorujussuusoq, sapinngisarlu tamaat appasitsinnissaa pingaartuusoq.
Aamma atuaruk Uldum: Uuliap akiata apparnissaa naatsorsuutigaarput
Aamma nunarsuarmi akit ukiorpassuarnik taama appasitsigisimanngitsut tikkuarpaa, uuliallu nunatsinni akianik inissiinermi taakkua aalajangiisuusariaqartut aalajangiusimallugu.
Taamaassaaq uulia nunarsuarmi akia qaffaqqeriataarnissaanut, taamaalippammi pissutsit allanngorsimassasut oqarpoq.
- Taanna allatut isummerfigisariaqassaaq. Soorunami uani killiffik, ullumikkut aallaavik, qisuariaatigaara, Vittus Qujaukitsoq KNR-imut oqarpoq.
Naalakkersuisut akuleruttariaqanngillat
Naaja Nathanielsenili isumaqarpoq, Naalakkersuisut piginneqatigiiffiit niuernerannut akuliuttariaqanngitsut. Taamaaliorunik piginneqatigiiffiit suliaannut immikkuualuttunut akkiuttussaannginnertik sullissinissamullu isumaqatigiissummik unioqqutitsissasut, taanna isumaqarpoq.
- Naalakkersuisut PolarOililu sullissinissaq pillugu isumaqatigiissuteqarnertik arajutsisimanavianngilaat, isumaqatigiissullu PolarOilip naammassiniartussaavaa. Taamaammat naluara Naalakkersuisut naatsorsuutigineraat, PolarOilip sullissinissamut isumaqatigiissummi piumasaqaatit unioqqutissagaat, Naaja Nathanielsen KNR-imut oqarpoq.
Aamma atuaruk PolarOil: Uliap qanoq akikillitiginissaa naluarput
Uuliap akiata qanoq appartigissanerannik, Vittus Qujaukitsoq oqaaseqarumanngilaq.
Taanna inuussutissarsiornermut naalakkersuisumut Randi Vestergaard Evaldsen innersuussivoq.
Randi Evaldsenilu sapaatit akunneri marluunngitsut qaangiuttut allappoq, uuliamut akit PolarOilimit aalajangersorneqartassasut.
Aamma atuaruk Uldum: Uuliap akitsuuserneqarnissaa inuiaqatigiinnut akeqassanngilaq