USA-p præsidentia Donald Trump, Venezuelamut Kalaallillu Nunaannullu isumaqatigiissutit iluaqutigalugit USA-p aningaasarsiorfissaanik, Iranimut sorsunnermut aningaasartuutaasunit amerlanerujussuarnik qulakkeerinnissimanerarpoq.

Tamanna tusagassiivimmi Fox News-imi oqarasuaatikkut qinersinissaq sioqqullugu marlunngornerup unnuaani apersorneqarnermini oqaatigaa.

- Kongressimi ilaasortap sianiitsup - Fox & Friends-imiusoraara (Fox News-imi aallakaatitassiaq, aaqq.) - Iranimut sorsunnermut 30 milliardit dollarinik atuisimaneraraanga tusarpara. Tamanna suunngilaq.

- Aningaasat taakkua, Venezuela pisinerlu (Kalaallit Nunaat, aaqq.) eqqarsaatigalugit amerleriarujussuarpagut. Pisiarinngilarput akiliuteqannginnattami, kisianni JKalaallit Nunaat qiviarutsigu, 5 billionit dollarinik naleqarpoq, Donald Trump oqarpoq.

5 billionit - imaluunniit 5000 milliardit dollarit - tassaapput 33.300 milliardit koruunit.

Trumpip Danmarkip, Kalaallit Nunaata USA-llu akornanni  isumaqatigiissut septembarip 22-anni atsiorneqartoq USA-mut aningaasanik sooq naleqarnersoq itisilinngilaa.

Isumannaallisaanermut illersornissamullu isumaqatigiissummi isumaqatigiissutaasut naapertorlugit, USA Kalaallit Nunaanni  ilaatigut sakkutooqarfiliorsinnaatitaalerpoq.

Uuliaqarfinnik atuisinnaaneq

USA-p Venezuelami uuliaqarfiit annertuut, Venezuelami præsidentiusimasoq Nicolas Maduro sakkutuunit 2026-p aallartinnerani tigusarineqarmat, atorsinnaanngorpai.

USA-p præsidentiata Fox Newsimit apersorneqarnermini Kalaallit Nunaat pillugu isumaqatigiissut innersuuteqqippaa.

- Kikkut tamarmik oqarput Kalaallit Nunaat pissarsiarinavianngikkiga. Pissarsiaraarput. Danmark atsioqatigaarput. EU ajunngillat. Tamarmik nuannaartikkusuppaannga. Billioninik dollarinik naleqarpoq, Trump oqarpoq.

Inuuniarnerup akisunera qineqqusaartut akornanni qinersineq sioqqullugu oqaluuserineqarnerpaavoq.

Trumpip nakorsaatit akii maanna præsidentiuffimmini appartissimallugit akitsuusiinikkullu politikki atorlugu nunat allamiut suliffeqarfiutaat USA-mut aningaasaliisissimallugit Fox Newsimut oqaatigaa.

Trumpip oqarnera naapertorlugu, USA-mi fabrikkinik suliffissuaqarfissanillu massakkut aatsaat taama sanaartortoqartigaaq.

Trumpip Amerikamiut marlunngornermi qiterpaarluni qinersisoqarnissaani, Amerikamiut Senatimut Repræsentanternes Hus-imullu qinigassanngortittut akornanniinnissaanik apersuinerup naalernerani takorluueqqullugit kajumissaarpai.

Misissuinerit naapertorlugit Trumpip partiiata republikanerineersuusup Kongressimi immikkoortortani marlunni Demokratinit amerlanerussuteqarnini attatiinnaruminaatsissinnaavaa.

- Qinigassanngortittut akornanniissaguma qinersisigut 50 procentinik amerlanerulissapput. Taamaattumik kikkut tamarmik qinigassat akornanniinnissara takorluussavaat, Donald Trump oqarpoq.

RITZAU