Uuliap akia apparaluttuinnarpoq
Iranip Saudi-Arabiallu aaqqiagiinnginneranni uuliap akia sapaatip akunnerata aallartinnerani qaffakkaluarpoq, nunalli taakku marluk Kangiani qiterlermi uuliamik tunisassiortut aaqqiagiinninngerisa maanna uuliap akia appartikkiartulerpaat.
Nordsøuuliap nappartamut akia pingasunngornermi ullaap tungaa 35,7 dollariinnaqalersimavoq, tamannalu ukiuni qulikkaani kingullerni aatsaat taama appasitsigaaq. Ilami 2004-ip kingorna aatsaat taama appasitsigaaq.
Uulia pillugu immikkut ilisimasallit akit appaqqinnerannut pissutaanerarpaat nunat uuliamik tunisassiortut OPEC-it akit qaffatsinniarlugit uuliamik qalluinertik appartissimagaluaraat, tamannali piviusorsiunngilluinnarsimavoq.
- Uuliamik toqqorsiviit ulikkaaraluttuinnarput, Iranillu Saudi-Arabiallu tunisassiornerminnik appartitsisinnaanerat piviusunngorsinnaanngitsoq, immikkut ilisimasalik Michael Hewson Reutersip oqarsimanerarpaa.
Maani Nunatsinni Polar Oilip ikummatissat akii 27 oorimik ippassaq appartippai.
Aatsitassanut naalakkersuisoq Vittus Qujaukitsoq ataasinngornermi nalunaarpoq uuliap akia suli apparteqqeqqullugu.
