Siulittaasoqarfik: Naleraq ikinnerussuteqarlutik oqaaseqaat pillugu politiinut unnerluutigineqartoq

Inatsisartuni siulittaasoqarfiup Naleraq USA-mut isumaqatigiissummut atatillugu ikinnerussuteqarluni oqaaseqaateqarnera pissutigalugu politiinut unnerluutigaa.

Inatsisartut siulittaasuat, Kim Kielsen (Attaviitsoq) taama oqarpoq.

Múte B. Egedep Naleraq Nunanut allanut Sillimaniarnermullu Ataatsimiititaliamit paasissutissanik oqaatiginnissimanerarlugu marlunngornermi pasillerpaa.

Tamanna ataatsimiititaliap USA-mut isumaqatigiissummut atatillugu suliaqarnera pillugu partiip ikinnerussuteqarluni oqaaseqaateqarnerani pisimanerarneqarpoq.

- Naleraq partiimi ikinnerussuteqarluni oqaaseqaateqarnerani paasissutissanik, Naalakkersuisut Inatsisartuni Nunanut allanut Sillimaniarnermullu Ataatsimiititaliami matut matoqqatillugit oqaatigisaannik isertuussassanik saqqummiussivoq, Múte B. Egede oqaluttarfimmit oqarpoq.

Inatsisartut siulittaasuata, Kim Kielsenip oqarnera naapertorlugu tamanna ataatsimiititaliap ataatsimiinneranit nipangiusimasussaatitaanermik aamma unioqqutitsineruvoq.

- Ataatsimiititaliap sukannersumik isertuussisussaatitaaneranik unioqqutitsineruvoq, inuiaqatigiinnilu tatigeqatigiinnissamut aamma innarliineruvoq, Kim Kielsen oqaaseqartarfimmit oqarpoq: 

- Siulittaasoqarfiup unioqqutitsineq tamanna politiinut unnerluutiginiarlugu aalajangerpaa.

Nipangiusimasussaatitaanermik unioqqutitsineq

Naleqqap ikinnerussuteqarluni oqaaseqaatit pillugu politiinut unnerluutigineqarnera pillugu Kim Kielsen oqaaseqareermat Vivian Motzfeldt oqaaseqartuni siulliuvoq.

Naleqqap siulittaasuata, Pele Brobergip periarfissaq atorluarlugu politiinut unnerluussisoqarnera oqaaseqarfigaa.

- Naleqqami siulittaasuuvunga, ilaasortakka illersorlugillu sernissorpakka, Pele Broberg oqarpoq:

- Februaarimili pissusilunnersi ingerlatiinnarparsi. Maani inersuarmi ilaasortat pasinarsarneqassanngillat.

Taassuma politiinut unnerluussisoqarneratigut USA-mut isumaqatigiissutip sammineqarneranik allamut sanguniartoqarsoraa.

- Pasinarsaasoqarneranik sammisaqartoqarnialernera eqqumiitsorujussuuvoq. Taamaammat isumaqatigiissutip imarisaa sooruna oqaluuserinianngikkissi, Pele Broberg aperivoq.

Vivian Motzfeldtilli pasinarsaasoqanngissoraa.

- Pasinarsaanerunngilaq. Pissutsit piviusut oqaluuserineqarput. Nipangiusimasussaatitaanermik unioqqutitsisoqarpat siulittaasoqarfiup tamanna suliassaraa, Vivian Motzfeldt akivoq.

Naleraq Nunanut allanut Sillimaniarnermut Ataatsimiititaliami suliaqarnertik pillugu ikinnerussuteqarlutik oqaaseqaaseqarnermini ataatsimiinnermit allattuisimallutik oqaatigaa.

Oqaaseqaamminni Múte B. Egedep nunatta USA-mut isumaqatiginninniarnermini USA nunatsinnut iluatsinngitsumik akiliuteqartinniarsimagaluaraa ataatsimiititaliamut paasissutissiissutigisimagaa nassuiaatigaat.

- Isumaqatigiissut isumaqatiginninniarnerit qanoq ingerlasimanerata piviusumillu avatatitsinniittut inerneraat. Naalakkersuisut tamanna tunngavigalugu nunatsinnik illersuinissamut atatillugu USA-mut toqqaannartumik akiliuteqartitsiniarsimanngillat, Múte B. Egede Inatsisartuni marlunngornermi oqarpoq.

Nutarterneqarpoq…