Aningaasaateqarfimmit 3 millionit koruunit Sisimiuni pinngortitamik ineriartortitsissutaassasut
Sisimiut eqqaanni Sallinnguani pinngortitaq ukiut 4.500-t sinnerlugit najugaqarfiullunilu piniarfiuvoq.
Sumiiffik A.P. Møller Fondenimit 3 millionit koruuninik aningaasaliiffigineqarluni ineriartortinneqaqqissaaq.
Arctic Circle Business aningaasanik pissarsisimasoq tusagassiuutinut nalunaarummi allappoq:
- Sallinnguit pillugit pilersaarutit ilaatigut aqqusiornermik, paasissutissiiffiusunik, isikkivinnik, ujaqqanik majuartarfilianik aqqutinillu pilersitsinermik imaqarput. Taakku tikeraanut aqqutigissaassapput, peqatigisaanillu kulturikkut pinngortitamillu eriagisassat mianernarnerpaat illersorlugit, tusagassiuutinut nalunaarummi allassimavoq.
Sallinnguit Sisimiut Kalaallit Nunaatalu oqaluttuarisaaneranni piffissaneersunit assigiinngitsunit pingaarutilinnik itsarnitsanik peqarpoq, soorlu najugaqarfiusimasunik, iliveqarfinnik, ivigaasanik illulianik, illorsuarnik takisuunik, saviminilerinermik suliaqarsimanermut uppernarsaatinik kiisalu Saqqaq kulturiata nalaaneersunik, tusagassiuutinut nalunaarummi allassimavoq.
- Sumiiffik ullumikkut nunaqavissunik takornarianillu atorneqarluarpoq, tamanna nunap nungullariartorneratigut aammalu paasissutissiissutit maanna atorneqartut pisoqalinerisigut ersarippoq. Ullumikkut takornariat arlalitsigut nalunaaqutsersugaanngitsumik ingerlaartarput, ilaatigullu oqaluttuarisaanermi pingaarutilinnik illukunut iliveqarfinnullu isertarlutik, tamannalu eriagisanik illersuineq pillugu inatsimmut naapertuutinngilaq.
Aqqutit nutaat
A.P Møller Fondenimit aningaasat ilaat nutaanik aqqusinniornermut taamaammat atorneqassapput.
- Suliniut aallartilluareerpoq, maannakkullu pingaarnerpaavoq nunaqavissunut tikeraanullu sumiiffiup orninneqarsinnaanera pitsaanerulersissallugu, peqatigisaanillu Sisimiut oqaluttuarisaanerannik kulturikkut oqaluttuarisaanermi pingaarutilinnik eriagisanik kiisalu pinngortitamik eriagisamik illersuineq, Suliniummi manageri Tanja Møller oqarpoq:
- A.P. Møller Fondip tapiissutaa suliniummut piviusunngortinneqarnissaanut amigaataasumik aalajangiisuulluinnartumik tapersiivoq, taamaattumik periarfissaq maanna piviusunngormat nuannaarutigeqaarput.
A.P Møller Fondenip tapiissuteqarnerata saniatigut Dronning Margrethe og Prins Henriks Fond itsarnisarsiuut sumiiffimmi misissuinerannut aamma tapiissuteqarpoq.
