Visit Greenland mittarfiup kinguaattoornera pillugu: Pakatsinarpoq paasinarlunili
- Akunnittarfinnik sanaartortunut aningaasaliisunullu soorunami uggornarpoq. Tamannami pissutigalugu naatsorsuutigisamisulli inoqarsinnaalernissaanut utaqqinerulaassapput.
Billede: Visit Greenland / Hjörtur Smárason.
Visit Greenlandip pisortaa, Hjörtur Smárason oqarpoq.
Nuummi mittarfimmik sanaartorneq ukiumik ataatsimik kinguaattoorpoq.
Mittarfiup 2024-mi ukiakkut naammassinissaa Kalaallit Airportsip naatsorsuutigaa. Mittarfik 2023-mi naammasisussaagaluarpoq.
AAMMA ATUARUK Nuummi mittarfik nutaaq kinguaattoortoq
Kalaallit Airportsip oqarnera naapertorlugu corona aamma oqartussanit mittarfimmut atortorissaarutinik nutaat piumsaqaateqalerneq tamatumani pissutaapput.
Hjörtur Smárasonip tamanna tupaallaatiginngilaa.
- Siullertut, soorunami ukiumik ataatsimik kinguartinneqartariaqarnera pakatsinarpoq. Kisianni tupaallaatissaanngilaq. Coronamimmi eqqugaanerat pissutigalugu unammillernartoqarnikuuvoq, Visit Greenlandip pisortaa oqarpoq.
Piareersarnissamut piffissaqarnerusoq
Illuatungaatigulli takornarialerinermik suliaqartut mittarfiup ammarnissaanut piareersarnissamut piffissaqarnerulaalerput, pisortaq oqarpoq.
Mittarfiliortiterneq
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Mittarfissat taakku pingasuusut 3,6 milliardit koruunit missaannik akeqassangatinneqarput.
* Mittarfinnik sanaartorneq 900 millionit koruuninik ilimagisamit akisunerussasoq Naalakkersuisut nalunaajaataanni nutaami aalajangiunneqarpoq.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
Paasissutissarsiffik: KNR
- Taamaammat piareersarnissatsinnut piffissaqarnerulaarpoq, tassa ima paasillugu maannakkut attaveqaqatigiinnermi maannakkut pigisatsinnik annertunerusumik pisariaqartitsisoqarneranik suliaqarnissamut piffissaqarnerulerpugut.
AAMMA ATUARUK Visit Greenland: Takornariaqarnerup piffissaata iluatsinnissaanut piffissaasualerpugut
- Nioqqutissanik ineriasaasoqassaaq, umiatsinut aningaasaliisoqassaaq, illuaqqanik akunnittarfinnillu sanaartortoqassaaq. Takornariammi tamarmik Nuuliartinniarneqanngillat, taakku aamma kangerlummut, nunaqarfinnut immaqalu Maniitsumut Paamiunulluunniit angalatinneqarusupput, Hjörtur Smárason oqarpoq.
Sanaartornerup kinguaattoornera Visit Greenlandip suliaqarneranut allannguivallaanngilaq.
- Ataatsimut isigalugu qaammatit aqqaneq-marluk sivisuallaanngillat. Nuuk 2024-p tungaanut matuneqalinngilaq. Kangerlussuaq aqqutigalugu suli tikittoqarsinnaavoq, tassanngaanniillu nunatta iluani angalasoqarsinnaalluni.
