Napaattooq: Uumassusilerisut qilalukkat qernertat pillugit ilisimasaat amigarput
Pisassiissutigineqartulli Atlantikup avannaani miluumasut imarmiut pillugit suleqatigiiffiup NAMMCO-p ilisimatuussutsikkut inassutigisaanit tallimariaartannik amerlanerupput.
Pisassiissutigineqartut Partii Naleqqameersup Jens Napaattuup ikippallaarnerarpai, agguaasseriaaserlu uumassusilerisut ilisimatuussutsikkut misissuineri amigartutut isigisani tunngaviginagit qanga pisassiisarsimanermik tunngaveqartariaqarsoralugu.
- Qilalukkanimmi qernertanik peqassuseq tamakkiisumik ilisimasaqarfigineqanngilaq.
Tunumi kingullermik kisitsisoqarpoq 2016-imi, taannalu peqassutsip kinguariaateqarfiuneranik takutitsisoq, Rikke Guldborg Hansen, Pinngortitaleriffimmi ilisimatusartoq oqarpoq,
AAMMA ATUARUK Qernertanik qilalugartassat ima aalajangersarneqartarput
- 2016-imi naatsorsuinerit Ittoqqortoormiit eqqaanni kujataatungaannilu qilalukkat qernertat 2008-mut naleqqiullugit ikinnerusut ilimanarsisippaat, taanna oqarpoq.
Ilisimatuup aamma oqaatigaa piujuaannartitsinissamik tunngaveqarluni piniarnissamut siunnersuinermi Pinngortitaleriffiup kisitsineri kisiisa tunngavigineqanngitsut, NAMMCO-lli naatsorsuineri aamma tunngavigineqartut. Kisitsisit naatsorsuinerillu tamaasa suliaqarfimmi ilisimatuunit allanit uppernarsarneqartut, ilisimatusartoq erseqqissaavoq.
Ittoqqortoormiinut qilalukkanik qernertanik qulinik Tasiilamullu aamma qulinik pisassiisoqarnissaa NAMMCO-p ilisimatuussutsikkut ataatsimiititaliaanit ukiuni kingullerni marlunni inassutigineqarpoq.
AAMMA ATUARUK Qaqortanik qernertanillu qilalugartassiissutit aalajangerneqartut
Inassutigineqartullu Naalakkersuisunut nassiunneqannginnerini NAMMCO-p aqutsinermut ataatsimiititaliaanut tusarniutigineqaqqaartarput. Ilisimatuussutsikkut inassutigineqartut apeqquteqarfigineqartarput allanngortinneqassanersullu nalilersorneqartarluni.
Tamannalu tunngavigalugu aqutsiveqarfimmut Tasiilamut qilalukkanik qernertanik 16-inik aqutsiveqarfimmullu Ittoqqortoormiinut 50-inik pisassiisoqarnissaa NAMMCO-mit ukiuni kingullerni marlunni inassutigineqarpoq. Taakkuli naammangitsut, Napaattooq isumaqarpoq.
- Mianersortumik tunngaveqarluni maanna pisassiisoqartarpoq, kisitsinerit amigartut, Ittoqqortoormiini Tasiilamilu qilalukkat qernertat 800-t missaanniissinnaanerannik inerniliiffiusut, aallaviullutik.
AAMMA ATUARUK Tunumi qilalukkanik qernertanik pisassiissutit ilaneqarnissaat itigartitsissutigineqartoq
Timmisartut atorlugit 2016-imi kisitsisoqarmat Kangerlussuup kujataatungaani qilalukkanik qernertanik takusaqartoqanngilaq. Taamaammat allorniusap sanimukartup avannamut 68º-imiittup kujataatungaani piniartoqannginnissaa NAMMCO-mit inassutigineqarpoq. Ittoqqortoormiit eqqaanni qilalukkat qernertat 500-t missaanniittut kisinneqarput Kangerlussuullu eqqaani 800-t. 2008-mi kisitsisoqarmat Ittoqqortoormiit eqqaanni qilalukkat qernertat 1.200-t kisinneqarput Tasiilallu eqqaani 1.100-t. Kisitsinermi kingullermi aamma Nuna Allanngutsaaliukkap avataani avannarpasinnerusumi qilalukkanik qernertanik amerlasuunik naammattuuisoqartoq, Pinngortitaleriffiup ilisimatitsissutigaa.
NAMMCO Atlantikup avannaani mliluumasunut imarmiunut tunngassuteqartunut ataatsimiititaliarsuaq, taannalu Islandimi, Savalimmiuni, Norgemi nunatsinnilu imarmiunik nungutsaaliuinermik, isumatuumillu aqutsinermik ilisimatusarnermillu ingerlataqartuuvoq.
AAMMA ATUARUK Qilalugartassiissutit amerlineqarnerat Pinngortitaleriffiup akerleraa
