Qilalugartassiissutit amerlineqarnerat Pinngortitaleriffiup akerleraa

40-nik ukiup naannginnerani qernertanik qilalugartasseeqinneq, Pinngortitaleriffiup isumaqatiginngilaa. Siunissami aamma nappanneqarsinaasumik pisassaqarnissaq eqqarsaatigalugu, taavalu aamma ukiorpassuarni suli inuussutigisinnaaniassagatsigit, Pinngortitaleriffik innersuussuteqartartoq, pinngortitaleriffimmi miluumasunik imarmiunik ilisimatuup Lars Wittingip tikkuarpaa.

AAMMA ATUARUK Qeqertarsuup Tunuanut Qimusseriarsuarmullu qilalugartassiissutit ilaneqarput

- Inassutigineqartunit amerlanerusunik pisassiisoqarnissaa uagut inassutigisinnaanngilarput, tassalu pisassiissutit amerlineqarnerat tapersinngilarput, Inassutitik qilalukkat qernertat amerlassusaannik missingiilluarumallutik aasami najortagaanni kisitsinernik tungaveqartut, Pinngortitaleriffik ilisimatitsivoq.

Taakkua erseqqissarpaat, qilalukkat ukiup ilaani kingusinnerusumi, sumiiffimmiit ataataimiit allamut ingerlaarsianni, amerlanerusutut misigineqarluarsinnaasut. Qilalukkat qernertat arlalikkaarlutik ingerlaaqatigikkajunnerupput, taamaammallu sumiiffiit sanioqqukkaangatigit, tamanna qilaluagaqaqisut misiginarsinaasarluni. Tamannali qassinik qernertanik qilalugaqarneranik takutitsisuunngilaq.

Taamaammat pisassiissutit amerlissaat mianersuunneqartariaqartoq, pinngortitaleriffimmi ilisimatooq isumaqarpoq.

AAMMA ATUARUK Aqutsiveqarfik Tasiilami qernertanik qilalugartassiissutit tamakkerneqartut

- Taamaaliorneq ajornartorsiutaavoq. Siunnersuisarnerimmi pilersinneqarput, pisassat amerlassusaat allanngutsaaliumallugit amerliartulaarniassammataluunniit. Taava amerlanerit pisarineqaraangata, piniagassat ikilissasut naatsorsuutigisarparput. Qimusseriarsuarmiittu immikkut qiviarutsigit, taakkua ikittunngooreerput, taava ilanngaqqikkaanni silatusaarneruallaassanngilaq, Pinngortitaleriffimmi ilisimatooq Lars Witting Merete Lindstrømimut taama oqarpoq.

Kisianni piniartut isumaat aamma tusaaniarsimagitik, piniarnermut naalakkerrsuisoq, Nikkulaat Jeremiassen, oqarpoq.