Qernertanik qilalugartassat ima aalajangersarneqartarput
Qilalukkat qernertat pisassiissutigineqartut ukiortaanngitsiartoq tamakkerneqarsimammata, nunatsinni sumiiffinni arlalinni piniartut aningaasaqarnermikkut ilungersunartorsiorlutik pisasseeqqittoqarnissaanik noqqaassuteqarput.
Pinngortitaleriffimmit pisassatut unnersuussutaat Partii Naleqqamit isornartorsiorneqangaatsiarput, Pinngortitaleriffillu arlaannaannulluunniit atanninngera aningaasaqarnikkullu kikkunnut atanera Demokraatineersumit Steen Lyngemit apeqquserneqarpoq.
AAMMA ATUARUK Qaqortanik qernertanillu qilalugartassiissutit aalajangerneqartut
Pisassiissutissanilli aalajangiinialernermi Pinngortitaleriffiup unnersuussutai kisimik tunngaviuneq-ajorput.
Suleriaatsimmi imaapput, Pinngortitaleriffik immikkut ilisimasallit nunani tamalaaneersut peqatigalugit piniagassanik kisitsisarluni ilisimatuussutsikkullu misissuisarluni.
Taakkulu tunngavigalugit Atlantikup Avannaani miluumasut imarmiut pillugit Kommissionimi NAMMCO-mi ilisimatuussutsikkut siunnersuisoqatigiit unnersuussusiortarput, aqutsinermut siunnersuisoqatigiinnut nassiunneqartussanik, aqutsinermullu siunnersuisoqatigiit apeqqutinut assigiinngitsunut isummissapput.
- Assersuutigalugu Kalaallit Nunaata inuinut qanoq kinguneqassanersoq. Tassalu Aqutsinermut siunnersuisoqatigiit Kalaallit Nunaannut inaarutaasumik inassusiortarpoq, NAMMCO-p pisortaanera Dr. Geneviève Desportes oqaluttuarpoq.
AAMMA ATUARUK Tunumi qilalukkanik qernertanik pisassiissutit ilaneqarnissaat itigartitsissutigineqartoq
Tassalu ilisimatuussutsikkut unnersuussutit ukioq manna malinneqanngillat, NAMMCO-p aqutsinermi siunnersuisoqatigiivisa unnnersuussutaat malinneqarmata, taakkualu Aqutsiveqarfik Ittoqqortoormiini ilisimatuut unnersuussutaanit tallimariaataapput.
NAMMCO Atlantikup avannaani miluumasunut imarmiunut tunngassuteqartunut ataatsimiititaliarsuaq, taannalu Islandimi, Savalimmiuni, Norgemi nunatsinnilu imarmiunik nungutsaaliuinermik, isumatuumillu aqutsinermik ilisimatusarnermillu ingerlataqartuuvoq.
Allaaserisamik siusinnersukkut allassimagaluarpoq, aqutsinermut siunnersoqatigiit Tasiilamut tunngatillugu unnersuussutaat ilisimatuussutsikkut unnersuussutiptallimariaatigigaa. Kisianni tassa Aqutsiveqarfik Ittoqqortoormiinut tunngasuuvoq. allaaserisaq manna iluarsisaavoq.
AAMMA ATUARUK Qilalugartassiissutit amerlineqarnerat Pinngortitaleriffiup akerleraa