Tunumi qilalukkanik qernertanik pisassiissutit ilaneqarnissaat itigartitsissutigineqartoq

Tasiilami nunaqarfiinilu inuussutissarsiutigalugu piniartunut qilalugartassat qernertat 16-it ukioq naatinnagu ilaneqarnissaat piniartut kissaatigaat. Pisasseeqqittoqassagaluarpalli tamanna peqassutsimut innarliisinnaanera aarleqqutigineqarpoq.

Tasiilami nunaqarfiinilu inuussutissarsiutigalugu piniartut taakkua 108-it 2018-imi qernertanik qilalugartassaat 16-it aamma siorna pisarineqanngitsoortut arfinillit oktobarimi tamakkerlugit pisarineqarput.
 
- Oqarsinnaavunga suunngillat piniartumut pisassiissutigissallugit inuit najoqqutaralugit. Soorlu inuit amerlassusaat pillugu. Nioqquteqaraangatta, inunnut, erngerlugit nunguttarpaat, Kuummiuni piniartoq William Umerineq taama oqarpoq.

AAMMA ATUARUK Ataatsimiititaliap qilalukkanik qernertanik Tunumi pisasseeqqittoqassanersoq isummerfigeqqugaa

Qeqertarsuup Tunuani aamma Qimusseriarsuarmi qilalukkanik qernertanik immikkut qilalugartasseeqqittoqareersorlu,  Tasiilami nunaqarfiinilu piniartut atsiornernik katerseriarlutik Naalakkersuisunut sapaatip akunnerata siuliani pisasseqqinneqarusullutik noqqaapput.
 
- Tamassaasiit eqqatsinni maani peqarpoq. Takoqattaartarput ataasiakkaanik. Kisianni Sermiligaami peqarpoq. Taama oqarpoq Kuummiuni piniartoq William Umerineq.

AAMMA ATUARUK Qeqertarsuup Tunuanut Qimusseriarsuarmullu qilalugartassiissutit ilaneqarput

Tasiilamili qilalukkanut qernertanut pisassat ilaqqinneqassangaluarpata peqassuseq taakani ulorianartorsiortinneqarsinnaasoq Pinngortitaleriffimmi immikkoortortaqafimmi pisortap Fernando Ugartep   aarleqqutigalugu oqarpoq.

 - Aap, maannakkummi peqassuseq pisaqartoqartarneranit appariartortinneqareerpoq. Taamaattumik pisasseeqqittoqassagaluarpat tamanna piujuaannartitsinertut isigineqarsinnaassanngilaq, qilalukkallu qernertat pioreersut suli ikinnerulernerannik kinguneqartussaassalluni.

Tunumi Kangerlussuarmi 2016-imi qilalukkanik qernertanik kisitsisoqarmat 800-t missaanniinnissaat nalilerneqarpoq, 
Tunumi Kangerlussuup kujataatungaani -  Tasiilap eqqaa ilanngullugu qernertat ima ikitsigaat qanoq amerlatigeqqissaanersut missingersorneqarsinnaasimanani.

AAMMA ATUARUK Aqutsiveqarfik Tasiilami qernertanik qilalugartassiissutit tamakkerneqartut