Tyrkiami aput sisoormat ikinnerpaamik 33-t ajunaartut

Tyrkiap kangisissortaani aput sisoormat inuit ikinnerpaamik 33-t ajunaarput.
Illoqarfiup Bahcesehirip illoqaani annaassiniartartorpassuit biilit matoorussaasimasut assaaffigigaat tv-kkut immiussat takutippaat. Assi © : Stringer/Reuters/Ritzau Scanpix
Allattoq Ritzau
februaarip 05-at 2020 13:58

Illersornissaqarfiup politiivi sakkutuujunngitsullu ajunaartunut ilaapput. Aput sisoormat apummit matoorussaasimasut ujaarineqarneranni aput sisooqqippoq, annaassiniallu taamaalinerani apummit ippassaq marlunngornermi aamma matoorussaallutik.

Nunap immikkoortuani Van-imi guvernørip oqarnera naapertorlugu inuit 30-t missaanniittut apummit annaanneqarput.

Annaassiniartartut biilii apummut marrissimasut illoqarfiup Bahcesehirip eqqaanit assit takutippaat.

Aputip sisoorfiata nalaani putsilernerata nittaalangaatsiarneratalu kingunerisaanik annaassiniarneq ajornakusoortoq, Tyrkiap nunamut namminermut ministeriata oqaatigaa.

Annaassiniartartut 300-t missaat aputip ippassaq marlunngornermi siullermik sisoornerata kingorna kalerrinneqarsimasut, illoqarfiup Vanip borgmesteriata Meki Arvasip oqaatigaa.

Aput tamaani ullumi pingasunngornermi taava sisooqqipoq, inuit marluk aputip ippassaq sisoornerani matoorussaasimasut ujaarineqarneranni sisooqqilluni.

/ritzau/Reuters