Tusagassiuut: Inuit toqoreernermi ikuallanneqarnissamik eqqarsaat sungiukkiartoraat
Nunatsinni iliveqarfiit inissakilliorput. Taamaattumik politikerit toqusut timaannut Nunatsinni siullermeerlutik ikuallaaviliorusupput.
Piffissami sivitsortumi tamanna oqallisigineqareerpoq - ukioq kingulleq Sisimiuni, kisianni aamma qanittumi. Sermitsiaq naapertorlugu Nuummi toqusut timaannut ikuallaavimmik sanaartortoqarnissaa Kommuneqarfik Sermersuumiit misissorneqarpoq.
Nunatsinnimi toqusut timaannut ikuallaaveqalernerup, maanngaanniit qimaguttut arsaannik ilisisinnaaneq periarfissanngortissavaa.
Massakkorpiaq tamanna aatsaat pisinnaavoq Danmarkimi toqugaanni, ikuallagaagaanni arsallu Nunatsinnut nassiunneqqarpata.
Politikerillu toqusut timaannik ikuallaasinnaalernissap periarfissanngornissaa kisimik kissaatiginngilaat.
Nuummi Biskoppeqarfimmi, Ilageeqarfiup aqutsisua Mariane Hansen-Heilmann, tusagassiuummut Kristeligt Dagblad-imut oqarpoq, illerfimmut ilineqarnermiit ikuallagaanissamik eqqarsaat innuttaasuniit sungiunneqariartortoq.
- Inuit ukiut quliinnaat matuma siorna eqqarsaammut tassunga akuersaannginnerujussuupput, piorsarsimassutsitsinniinngimmat. Taamatulli eqqarsarneq nalinginnaasunngoriartuaarpoq, Mariane Hansen-Heilmann julimi oqarpoq.
80 procentit toqusut timaannut ikuallaavittaarnissaq kissaatigivaat
Innuttaasut Kultureqarnermut, Timersornermut, Ilageeqarnermullu Immikkoortortaqarfiimmiit, ataatsimik arlalinnilluunniit, toqusut timaannut ikuallaaviliortoqarnissaa pillugu 2020-mi aperineqarput. Apeqqummut tassunga "pinngitsoornani"-mik akissuteqartut 80 procentiupput. Sermitsiaq taamatut allaaserinnippoq.
Taamatut isumaqartut ilaat Minik Hansen Nuummeersoq, Kristeligt Dagbladimiit oqaloqatigineqarpoq.
- Inissakilliortoqarnera eqqarsaatigalugu tamanna siunissami ajornannginnerulersitsissasoq eqqarsarpunga, iliveqarfimmi, immaqa ungasissinnerusumiittumi, ilisiffissarsiornissaq pisariaqarunnaarniassammat, taanna tusagassiuummut oqarpoq.
Taassumap Sisimiuni iliveqarfik inissaarummat illoqarfiup avannarpasinnerusortaani nutaamik iliveqarfiliortoqartariaqarsimanera erseqqissarpaa.
- Utoqqaat pitsorluttullu asasatik ilerfiarniarlugit taxartariaqartut eqqarsaatigaakka. Amerlanerusut ikuallanneqartartuuppata tamanna immaqa pisariaqarnavianngikkaluarpoq, iliveqarfiit taama sukkatigisumik ulikkaariartortassangikkaluarmata, taanna oqarpoq.
