Nuummi uumasunut iliveqarfeqarfik ammalerpoq

Nuummi uumasut iliveqarfiat ammarpat, innuttaasunit siunnersuut piviusunngortussaavoq. Sanaartorneq sivisusimavoq, kisianni suliami nammineq kajumissutsimik suleqataasut ikiuulluarsimaqaat, uumasut iliveqarfissaanni akisussaasut ilaat taama oqarpoq.

Allattoq Lærke Schmidt Fallesen

juulip 03-at 2024 12:41

Nutserisoq Erninnguaq Reimer

Inuk toquppat iliveqarfimmi ilisaassaaq. Qimmeq, qitsuk kaniinarluunnit toquppat qanoq iliortoqassava?

Nuummi uumasuutinut iliveqarfik, innuttaasut uumasuutiminnik ilisinissaannut, piffissami qanittumi periarfissanngussaaq.

Ammarnissaa qaqungu pissanersoq inissivinneqarsimanngilaq, kisianni qaammatini qaninnerni ammarneqarnissaa ilimagineqarpoq, kommuneqarfik sermersuumiit tusagassiuutinut taama nalunaaruteqarput.

-Suliat kingulliit inissileruttorput. Suliassaq kiserngoruttoq tassaavoq nunataat assannissaa. Suliassaq qanittukkut neqerooruteqartitsissutigineqassaaq, qaquguli ammarneqarnissaa oqaatigisinnaanngikkallarparput. Naatsorsuutigaarput 2024-mi aasap naanerani ammassasoq, Kommuneqarfik Sermersuumi Sanarfinermut Avatagiisinullu ingerlatsivimmi pisortaq Rudi Birkedal taama oqarpoq.

Innuttaasumit siunnersuut piviusunngortinneqarpoq

Nuummi uumasut iliveqarfeqarfeqalernissaannik innuttaasumit siunnersuutigineqareersoq, Sanarfinermut Avatangiisinullu Ingerlatsivik suliamik saqqummiussamik 2021-imi aasakkut suliaqalerpoq. Suliniut annertuumik taperserneqarluarpoq, taamaalereermat kommuneqarfik sermersuumi najukkami ataatsimiititaliamut akuerisassanngortinneqarpoq. Ukioq naanngitsooq suliassatut akuerineqarlunilu aalajagiunneqarpoq.

Uumasuutinut iliveqarfik Pisissip aamma Ukkusissap sivingarnata akornanniissaaq. Uumasuutinut iliveqarfik uumasunut 100-nut inissaqarpoq, taakkunannga siulliit qulit inniminnerneqareerput.

2021-miilli kommuni kajumissutsiminnik suleqataasunik suleqateqarluni inissiivissarsiulersimasimavoq, minnerunngitsumik sumiiffimmi aqutsineq sanaartorfiusussarlu eqqortoq nassaariniarneqarsimapput, maannalu taakku anguneqalerput.

Suliniummik tapersersuillutik nukippassuit nammineq kajumissutsimik atorneqartut assut tupaallaannarput. Taakkoqanngippat maani Nuummi uumasuutinut iliveqarfik pilersinneqarsimanavianngikkaluarpoq, Tom Amtoft, qimminut nakkutilliisoq, iliveqarfimmi inissanik ilisimasalik taama oqarpoq.