WWF: Nannut aallaaneqaratik qimaatinneqartassapput
Kujataani nannut siumorneqartarnerat takornartaajunnaareerpoq. Nanoq inoqarfinniitillugu inunnik ersiortitsisaqaaq, taamaammat innuttaasut illersorniarlugit nannut aallaaneqartarnissaat kissaatigineqartarpoq.
Nannulli inoqarfinniit qimaatinneqartarnissaat WWF-ip kissaatigaa, soorlu Ittoqqortoormiini Canadami Alaskamilu taamaaliortoqartartoq.
WWF nannut aallaaneqannginnissaat pillugu, upalungaarsimaniarmut tunngatillugu karsi assigiinngitsunik sillimaniarnermut atortunik imalik inoqarfinnut tunniunniarpaat.
Taamaammat nannut aallaaneqannginnissaat anguniarlugu WWF upalungaarsimaniarmut atugassamik karsimik assigiinngitsunik sillimaniarnermut atortunik imalimmik inoqarfinnut tunniussisalissaaq.
- Inunnik nannunilluunniit kingunerlutsitsisoqannginnissaa piniarlugu imaluunniit arlaannik pisoqariataarnissaa pinaveersaarniarlugu taama suliniuteqarpugut. 2022-mili aallartinneqarpoq, massakkut kiisami allaffitsinni naammattunik sulisoqaleriaratta taanna suliaq ingerlassinnaanngorparput, Malene Lynge Kalaallit Nunaanni WWF-mi aqutsisoq taama oqarpoq.
Karsit imarivaat, qaammartartut, nannut qimaatinnissaannut siggartaat nipitooq, ajunaalernermi ikumatittakkat tassa nødplusinik aamma taaneqartartut kiisalu aallaasit qimaasitsiniutit imassaalu.
Silap pissusaata allanngoriartornerata kingunerisaanik sikuiaartalernera peqqutaalluni nannut nunaliartarnerat akulikillivoq, taamaammat inoqarfiliartalernerat aamma akulikillilluni.
Upalungaarsimaniarnermut karsinik tunniussineq toqqissisimanermik sillimaniarnerullu annertusarniarneranik aallaaveqartoq Malene Lynge erseqqissaavoq.
Qaqortumi innuttaasunik ataatsimiisitsineq
Suliniut assingusoq Ittoqqortoormiini aallartinneqareerpoq, taamaammallu misileraluarneqareerluni.
- Ittoqqortoormiini nannunut patruljemik taallugu ukiuni qulingiluani ingerlatsereerpugut, aamma nannunut innuttaasunullu akornutaasinnaasut pillugit misilittagaqarluartuuvugut, Malene Lynge oqarpoq.
Taamaammat aamma Erling Madsen Ittoqqortoormiini suliniummut nannunik patruljemik ingerlatartoq Qaqortumi peqataavoq, nannunillu qimaatitsisarnermut misilittakkani oqaluttaralugit.
Illoqarfinni upalungaarsimanermut karsinik tunioraasoqassanngitsoq innuttaasunik ataatsimiisitsinermi erseqqissaassutigineqarpoq, pissutigalugu illoqarfinni upalungaarsimasuutitaqareermat, soorlu politiit qatserisartullu.
Karsip imarisai innuttaasunik ataatsimiisitsinermi takutinneqarput nassuiarneqarlutillu, WWF-llu siunertai aamma saqqummiunneqarlutik.
WWF-ip atortut tunniussatik qanoq pisariaqartiginersut paaserusummassuk, tunineqartut atortussaminnik atuisimagunik WWF-mut nalunaaqquneqarput. Nannut taama amerlatigisut sooq inoqarfinnukartarnerisa misissorluarnissaa maanna pilersaarutaavoq.
