Nanoq nunatta kujataani najugaqarfiusumut qanillattungaatsiartoq. Maanna toqunneqartoq
- Hiistiutitta savaatittalu nerineqarnissaa ernumagisorujussuuara.
Nunatta kujataani Qassiarsummit 7 kilometerinik ungasitsigisumi savaateqartoq Peter Lund oqarpoq.
Taanna nannup sumiiffimmiittup toqunneqarnerata aqaguani taama oqarpoq.
Nannullu toqunneqarnera Kalaallit Nunaanni Politiit uppernarsarpaat.
- Nannup najugaqarfiusumukaqattaarnera pissutigalugu aallaaneqarpoq, pigaartut pisortaat, Thomas Ottesen oqarpoq.
Peter Lundip nanoq ippassaq marloriarluni takuaa: Siullermik umiatsiamiit nanoq Iterdlammit kangerluk ikaaraa, aappassaaniillu illumi eqqaanit hiistit ungaluinut qanillingaatsiarsimasoq.
- Qanittuarakasiuvoq. Hiistit qimaaniarsaripput, taamaammat navianartoqartoq ilisimavaat, taanna oqarpoq.
Navianartoqaratarsinnaasoq
Savaatillip nanoq ATV-mik seqqornernillu qimaatinniarsarigaluarpaa. Kisiannili, taanna oqarpoq:
- Savaateqarfimmut allamut ingerlaqqiinnarpoq.
Unnukkut arfernup missaani tamanna pisoq, Peter Lund oqarpoq.
Pigaartut pisortaata nanoq unnukkut qulit missaani toqunneqartoq paasissutissiissutigaa.
Kommunefogdip sianerluni politiinut nalunaarutiginninnera malittarisassat malillugit pisoq taassuma erseqqissaatigaa.
- Sumiiffiit uumasoqarfiullutillu inoqarfiusut qanittuleraangatigit taava navianartoqalinnginnissaa pissutigalugu toqunneqartarput, Thomas Ottesen oqarpoq.
Aalisarnermut piniarnermullu naalakkersuisoqarfik aamma nalunaarfigineqarpoq.
Nannup ingerlaarneranit assit videoliallu arlallit Facebookikkut siammarterneqarput. Arne Louie Møller nanumut angingaatsiartumut Sillisit qanittuani qanillingaatsiartut ilagaat. Videoliaq KNR-imut siammarterneqarsinnaatitaasoq uani takusinnaavat:
