Sisimiuni toqusut timaannik ikuallaavittaarusupput, aningaasanillu maanna immikkoortitsisalissapput
Manna iliveqarfik inissaarulluinnalermat tamaani ilineqarusullutik inniminneereersimasut kisimik ilineqartarput, iliveqarfillu nutaaq illoqarfiup avannaatungaaniittoq ukioq februaarimi atulersinneqarpoq, annertoorujussuunanili.
Tassa ukiut arfinillit- arfineq marluk qaangiuppata nutaamik iliveqarfiliortoqartariaqassammat kommunalbestyrelsemut ilaasortap Navarana Lennert Andersenip, ataatsimiinnerminni siunnersuutigaa toqusut timaannik Sisimiuni ikuallaaveqalernissaq anguniarneqassasoq.
Inuit Ataqatigiit sinnerlugit Qeqqata Kommuniani kommunalbestyrelsimi ilaasortaq siunnersuusiortuuvoq:
- 2028-imi kingusinnerpaamik kommunalbestyrelsep aalajangereersimasussaavaa iliveqarfittaassaq nutaaq sumiissanersoq. Taamaammat assut kissaatiginarpoq - aningaasarpassuit sipaarutigisinnaakutsoorpagut - siumut pilersaareernikkut taamatut inissiigaluarutta krematorieqalernissaanut, Inuit Ataqatigiit sinnerlugit Qeqqqata Kommuniani kommunallbestyrelsemut ilaasoortaq Navarana Lennert-Andersen taama oqarpoq.
20 millionit koruuninik akeqassangatinneqartoq
Toqusut timaannik ikuallaavik Nunatsinni sananeqarpat qanoq akeqarsinnaanersoq naalakkersuisut 2020-mi misissuisereerlutik taamani missiliorpaat 20 millionit koruuninik akeqarsinnaasoq, pilersaarusiorneq, sanaartorfigissaaneq, illutaa, ikuallaavittaalu filterileriigaq ilanngullugit, taamanilu missiliuinermi Nuuk aallaavigineqarpoq.
Navarana Lennert-Andersen isumaqarpoq, ukiuni tulliuttuni aningaasaliissutissat suliarineqaraangata aningaasanik immikkoortitsisarneq atorlugu toqusut timaannik ikuallaaviliornissaq anguneqarsinnaasoq.
- Pilersaarusiorneq ingerlasariaqarpoq taavalu aningaasat taakkua katersoqqaartariaqarpagut, taamaammat piviusunngornissaa imaaliallaannagassaanngilaq, soorlu ukiut pingasut qaangiuppata krematorieqalernissaa piviusunngorsinnaanngilaq, kisianni pilersaarut tassunga ingerlalereersinnaavoq, Navarana Lennert-Andersen taama oqarpoq.
Inuit 54-it Sisimiuni siorna toqusut
Pilersaarusiornissarlu aallartinneqarsinnaanngussaaq, kommunalbestyrelsep ataatsimiinnermini siunnersuut tapersermagu.
Toqusut timaannik ikuallaaveqalernissamut kommuni aningaasanik missingersuutinut immikkoortitsisalissasoq suleqatigiit Siumut, Inuit Ataqatigiit aamma Atassut akueraat.
Illuatungiliuttuniillu Naleraq siunnersuummut tapersiivoq, kissaatigalugulu qanoq akeqarumaarnissaa ataatsimiititaliami misissorluarneqassasoq.
- Aamma innuttaasorpassuit saaffiginikuuaannga taperserlunga. Navarana Lennert-Andersen taama oqarpoq.
Taanna nuannaarpoq innuttaasut ikinngitsut tunuliaqutaralugit siunnersuutini taperserneqarmat.
- Aamma inuppassuit immaqa aamma tarnimikkut eqqissinerussagaluarput taamatut peqalertuugaluarpat, NAvarana Lennert-Andersen naggasiivoq.
Sisimiuni oqaluffiup paasissutissiinera naapertorlugu inuit 54-it Sisimiuni siorna 2023-mi toqupput.
