Tunumi aalisakkerivissaq aporfippassuaqalertoq
Aalisakkerivilionissarli tullinnguutsinnagu, aporfiiit arlallit anigorneqaqqaartariaqassapput.
Umiarsualivik allineqaqqaartariaqarpoq, pilersaarusiarlu piviusunngussappat, kommune nunaminertamik tuniseqqaartariaqarluni.
- Sanasinnaanngilagut lokalplaneqartinnata, kommuunip arealimik tunisinnaanngilaatigut lokalplanimut ilaanngimmat, pilersaarusioqataasoq, Hansinnguaq Matheassen, sanaartulernissamut alloriarfissat pillugit ataatsimeeqqammertoq, KNR-imut taama oqarpoq.
Tuluit, savalimmiormiut kalaallillu Tasiilami katersuuttut
Taassuma aamma oqaatigaa, Suliniuteqartut tuluit, savalimmiormiut kalaallillu piginneqatigiiffimmi Tasiilami najugaqarfeqartumi, Greenland Fish and Offshore-mi, katersuuffeqartut.
Aalisakkeriviliornissamut aningaasat 200-niit 300 million koruunit pallillugit atorneqassasut ilimagineqarpoq. Aningaasalli qasserpiaat atorneqassanersut, aallarnisaasut maanna eqqoriaruminaatsikkallarpaat.
Taava aamma qaavatigut, Tasiilami umiarsualiviup allilernissaa pisariaqarpoq, eqqarsaatinullu ilaavoq, tunisassiorfiliortut allilerinermi aningaasaleeqqaassasut, tassungalu siunertamut 70 million koruunit missaat aningaasartuutissaassasoraat.
Aalisakkeriviliornissamilu avaleraasartuut toqqammaviginiarneqarput.
Aalisakkat Tasiilamit tuluit nunaannut
- Taava makrelit siunnerfigivavut ukiuni tulliuttuni taakkua tunitsivissaannik tulaassuivissamik pilersitsiniarluta.
Hansinnguaq Matheassen aamma oqarpoq, Tasiilami suliarineqartut tamarluinnarmik tuluit nunaannut tunineqartarnissaat takorloorneqarpoq.
Naalakkersuisunut ilaasortap, Mala Høy Kúkop ilanngullugu eqqaavaa, Tasiilami erngup nukinganik innaallagisiorneq naammakkunnaarsimasoq, aalisakkeriviliortoqarpallu pisariaqartitsisoqarnerulissasoq. Tassungalu tunngatillugu nukissiorfiit nalunaarsimasut, aalisakkeriviliorfissap innaallagissamik imermillu pilersorneqarnissaanut qinnutigineqartoqareersimasoq.
Alloriarnerup tullissaa
Taava aporfiit anigorneqareerpata tunisassiarineqartussat Tasiilap eqqaanniit Tasiilaliaattarnissaannut aaqqiinissaq tullinguuttunut ilaassaaq:
- Alloriarnerup tullerissavaa umiarsuarmik pisineq taavalu pisassanik qinnuteqarneq, Hansinnguaq Matheassen taama oqarpoq.
Tassungalu ilanngullugu oqaatigaa, aalisakkerivissap avaleraasartuut 40.000 tonsit pisariaqartittartussaammagit, aalisartut Tasiilap qanittuaneersut aalisakkerivissamut tulaassuisarnissaat pingaartillugu, taamaanngippat aalisakkerivissaq napasinnaassanngimmat.
