Amerikamiut senatoriat Nuummiittoq: Trumpip Kalaallit Nunaata tatiginninnera iliuuseqarnermigut pilerseqqissavaa

Kalaallit Nunaata USA-p neriorsuutini attatissanerai takoqqaassavaa. Nunat marluk akornanni taamaalilluni aatsaat tatigeqatigiittoqaleqqissinnaavoq.

Republikanerit senatoriat, Lisa Murkowski nunatsinni ukioq manna pingajussaannik sapaatip akunnerani matumani tikeraartoq isumaqarpoq.

- Tatiginninnerup anguneqarnissaa ajornakusoorpoq. Piffissamik pisariaqartitsiffiuvoq, tatigeqatigiittoqaleqqinnissaalu sivisussaaq, taanna oqarpoq.

Kalaallit Nunaata USA-llu atassuteqarnerat Donald Trumpip Kalaallit Nunaannik tiguserusunnerminik arlaleriarluni ukiuni kingullerni nalunaaruteqartarnerani innarlerneqangaatsiarpoq.

Kalaallit Nunaata, Danmarkip USA-llu illersornissamut isumaqatigiissutaat nutaaq suleqatigiinnermik nutaamik maanna tunngaviliissaaq.

Alaskamili senatorip oqarnera naapertorlugu atsiorneq naammanngilaq.

- Kalaallit USA-p oqaatsini attatissanerai aamma isumaqatigiissummi aalajangersakkat malinneqarnersut takusariaqarpaat, taanna KNR-imut Hotel Hans Egedemi oqarpoq.

Tamatuma saniatigut Kalaallit Nunaat susoqarnissaanik ilisimatinneqaannartarani nalitut, tusaaneqartutut aalajangiinermilu peqataatinneqartutut iliuuseqarfigineqassaaq, taanna erseqqissaavoq.

Trump upperineqarsinnaava?

Kalaallit Nunaata Trumpip isumaqatigiissummi aalajangersakkat ilaatigut kalaallit kulturiannik, inooriaasiannik, pinngortitaanillu illersuinermut ilaatigut tunngassuteqartut malissagai naatsorsuutigisinnaaneraa KNR-ip Murkowskimut apeqqutigaa.

Senatorip tamanna qulakkeeraluni oqaatigisinnaanngilaa.

Taassumali illuatungeriit isumaqatiginninniaqataasut isumaqatigiissut pitsaasutut naleqquttutullu nalileraat erseqqissaatigaa. Isumaqatigiissutilli qanoq piviusunngortinneqarnissaa aalajangiisuussaaq.

- Qulakkeerneqareersutut isigissanngilarput. Tamanna iliuuseqartoqarnerani takuneqarumaarpoq, taanna oqarpoq.

Trumpimut USA-mulluunniit tatiginnittoqarsinnaanersoq kisiat pineqassanngitsoq, Murkowski isumaqarpoq.

Illuatungeriilli pingasut isumaqatigiissutip malinnissaa tatigeqatigiileqqinnissarlu sulissutigissavaat.

Tamanna suleqatigiinnerup suli inissinneqarsimanngitsortaanut, ilaatigut najukkami aningaasaliinissanut aamma kalaallit suliffeqarfiit suliniutinut nutaanut peqataasinnaanissaanut periarfissanut aamma atuuppoq.

USA tatiginnilersitseqqissasoq

Murkowskip oqarnera naapertorlugu aaqqiagiinngissuteqarneq Kalaallit Nunaannut kisimi tunngassuteqanngilaq. Trumpip nalunaarutai USA-p iligisaasa allat akornanni qularnermik aamma pilersitsipput.

- Nunarsuup qaammatini kingullerni 20-ni takusai tassaapput Amerikamiut naalakkersuisoqarfiannit nalunaarutigineqartartut - ikinngutitsinnut – USA-mut patajaatsumik atassuteqarnissamik naatsorsuuteqarsimagaluartunut aalassatsitsisut, taanna oqarpoq.

Taamaammat USA-p Kalaallit Nunaata tatiginninnera kisiat pilerseqqissanngilaa, nunarsuulli sinneranut USA-p patajaatsuunera iligisatullu suli tutsuiginartuunera aamma takutissallugu.

Illersornissamut isumaqatigiissutip Kalaallit Nunaannut, Danmarkimut USA-mullu iluaqutaasumik Issittumi sillimaniarneq nukittorsassagaa neriuutigaa.

Suleqatigiinnerulli piviusunngortinnissaa pisariaqarpoq.

Taassumalu USA præsidentip illorsuaniittumit angummit annerusoq aamma erseqqissaatigaa.

USA sakkutooqarfinnik nutaanik atulersitsissappat imaluunniit sakkutooqarnermut attaveqaasersuutinut aningaasaliissuteqarniarpat kongressi pingaaruteqarluinnartumik inissisimavoq. Kongessi tassaavoq power of the purseqarpoq (naalagaaffeqatigiit aningaasaataannik aqutsisuuvoq aaqq.)

Republikanerinit nalinginnaanngitsumik isummersortoq

Lisa Murkowskip Donald Trump arlaleriarluni isumaqatigisimanngilaa, taannalu republikanerit senatoriinit taassuma poliutikkikkut sammivigisaanik ammasumik isornartorsiuisut ikittut ilaanniilluni.

Taamaammat taassuma Kalaallit Nunaannut tunngatillugu isummernera Republikanerit partiiata præsidentip politikkikkut sammivigisaanik sunnerneqaleraluttuinnartup isummerneranik ersersitsinngilaq.

Taamaakkaluartorli politikkikkut sunniuteqarsimavoq:

Trumpip Kalaallit Nunaannut siorasaaruteqarnera februaarimi qaffasinnerpaalermat senatorit eqimattat, partiinit assigiinngitsuneersut katersorpai, taakkulu Kunngeqarfimmut tapersersuinerminnik takutitsiartorlutik Nuummut Københavnimullu angalapput.

Taassuma tatigeqatigiinnerup piffissap ingerlanerani pilerseqqinnissaanut suleqatigiinnerullu nukittuup isumaqatigiissummik nutaamik tunngaveqarnissaata qulakkeerneqarnissaanut sapinngisamik siuttuuffigineqarnissaq erseqqissaatigaa. Kisianni tamanna oqaatigineqareersutut ullut tamaasa sulissutigineqartariaqarpoq:

- Tatigeqatigiinnermik pilersitseqqinnissaq sulissutigissavarput. Pisussaaffigilikkatta malinneqarnissaat sulissutigissavarput, taanna oqarpoq.

USA-p neriorsuutini naammassissanerai isumaqatigiissutip iliuusinngortinneqarnerani takutinneqarumaarpoq.

KNR-ip apersuinerata kingorna Donald Trump, qinigaaffiup qaammatip tulliani qiterpaarnissaanut atatillugu Alaskami innuttaasunut ataatsimiititsiartortoq, Kalaallit Nunaanni uuliamik, gassimik aatsitassanillu annertuumik misissuisoqangajalersoq inoqatinut attaveqaatikkut, Truth Socialikkut nalunaaruteqarpoq.

Murkowski nalunaaruteqarneq taanna kingulleq pillugu oqaaseqartinnissaa KNR-imit iluatsinneqanngilaq.