Norskip inatsisartunut ilaasortap Chemnitz Murkowskilu Nobelip Eqqissinermut Nersornaasiuttagaanut innersuussutigigai
Norskit inatsisartunut ilaasortaata, Lars Haltbrekkenip folketingimut ilaasortaq, Aaja Chemnitz (IA) aamma Amerikamiut senatoriat, Lisa Murkowski Nobelip Eqqissinermut Nersornaasiuttagaanut innersuussutigai. Taassuma tamanna KNR-imut paasissutissiissutigaa.
Norskit inatsisartuini ilaasortap oqarnera naapertorlugu Aaja Chemnitz aamma Alaskami senatori, Lisa Murkowski USA-mut tunngatillugu ilungersuassuteqarnermut atatillugu pingaarutilimmik inissisimanertik pissutigalugu ataqqinaammik nersornaaserneqartariaqarput.
Taakku marluullutik Amerikamiut præsidentiata Donald Trumpip Kalaallit Nunaannut atatillugu anguniagai oqaaseqartarnerilu siusinnerusukkut isornartorsiorpaat.
Politikerit taakku marluullutik USA-mit senatorit, Danmarkimi folketingimi ilaasortat aamma Kalaallit nunaanni Inatsisartunut ilaasortat akornanni Folketingimi ataatsimiinnissaat januaarimi sulissutigaat. Taakku tikeraarnerat Amerikamiut præsidentiata, Donald Trumpip Kalaallit Nunaata USA-mut ilaasariaqarnera arlaleriarluni oqaatigereeraalu pivoq.
- Aaja (Chemnitz, aaqq.) aamma Lisa (Murkowski, aaqq.) Amerikamiut præsidentiata aaqqiagiinnginneq pilersissimasaat nunaminni annikillisarniarlugu qanimut suleqatigiissuteqarput. Taakku marluk aaqqiagiinnginnermut annikilliinissamut suleqatigiilluarput, Lars Haltbrekken oqarpoq.
Issittumi nunanik qaninnerulersitsisut
Nobelip Eqqissinermut Nersornaasiuttagaanut innersuussuteqarnissamut januaarip 31-at killiussaavoq. Nunani inatsisartunut naalakkersuisunullu ilaasortat innersuussuteqarnissamut periarfissaqarput.
Lars Haltbrekken Inuit Ataqatigiit partiitut suleqatigisaanit, Sosialistisk Venstrepartimeersoq Norgemi inatsisartunut, Stortingetimut qinigaavoq. Lisa Murkowskilu Alaskami Republikanerit Partiivineersuulluni.
Haltbrekken Issittumi Inatsisartuni Ataatsimiititaliaani Aaja Chemnitzip 2021-mili siulittaasuuffigisaani Lisa Murkowskillu siulittaasumut tullersortaaffigisaani ilaasortaavoq.
Taakku siulittaasuunerat sunniuteqarluarpoq, Lars Haltbrekken oqarpoq.
- Suleqatigiinnerat inatsisartunut qaninnerulersitsivoq, Issittumi inunnik qaninnerulersitsivoq, aamma akornatsinni paaseqatigiilluarnerunissamik pilersitsivoq. Issittumi nunat inuiaqatigiillu imminnut qaninnerulersippaat, taanna oqarpoq.
Lars Haltbrekkenip tamatuma saniatigut Amerikamiut præsidentiata Kalaallit Nunaannik tiguaarusunnera Issittumi piffissami matumani aarlerinarnerpaasoq oqaatigaa.
- Issittumi Inatsisartut USA-p præsidentianit sioorasaarutigineqartut assuaraat aaqqiagiinnginnermullu annikillisaanissamik sulissuteqarlutik, taanna oqarpoq.
Danskit ministeriunerat Mette Frederiksen Folketingimut qinersinissamik sapaatip akunnerata siuliani sisamanngornermi suaarutiginninnerata kingorna Aaja Chemnitzip qinigassanngorteqqinniannginnini paasissutissiissutigaa. Inuit Ataqatigiinneersoq, Aaja Chemnitz Folketingimut 2015-imili ilaasortaalerpoq.
