Alaskap senatoriata Trump akerlilerlugu taasisoq: - Kalaallit Nunaata siunissaa kalaallinit aalajangerneqassaaq
Alaskap senatoriata, Lisa Murkowskip Nuuk septembarimi tikeraarpaa. Taassuma Donald Trump Kalaallit Nunaata ikinngutigigaa tassani oqaatigaa.
Naak taassuma præsidenti parteeqatigigaluarlugu demokraatit peqatigalugit sisamanngormat taasivoq.
Tassani inatsit 1973-imeersoq præsidentip sakkutooqarnikkut nunamik allamik kongressip akuersissuteqannginnerani atuisinnaannginnissaanut tunngasoq taasissutigineqaqqippoq.
Taasineq senatorinit 52-init akuerineqarpoq 47-llu akerliullutik. Tamannali præsidentip sinniisoqarfianit, republikanerit amerlanerussuteqarfigisanni aamma akuerineqaqqaassaaq, inatsillu Donald Trumpimit aamma atsiorneqaqqaassaaq.
Lisa Murkowski suleqatini arlallit peqatigalugit sapaatip akunnerani matumani Danmarkiliassaaq. Ataatsimiinnissaq taassuma Aaja Chemnitzimik (IA) sapaatip akunnerata siuliani oqaloqateqarnerata kingorna pilersinneqarpoq.
Sentorip Kalaallit Nunaata USA-llu akornanni pissutsinut atatillugu isummani pillugu KNR-imit apersorneqarnissani itigartitsissutigaa. Taarsiullugulu senatimi oqalugiarnini innersuussutigaa.
Oqalugiarnermi tassani naalakkersuisunut tapersiissuteqarpoq, kisianni Kalaallit Nunaata kissaatigippagu – Free Associationimik isumaqatigiissuteqarnissaq aamma innersuussutigaa.
Tigusineq piffissamik asuleerinerusoq
Lisa Murkowskip oqalugiarnermini USA-p tigusinissaa piffissamik asuleerinerusoq oqaatigaa.
- Senatimi maani tamanna pillugu oqaluuserinninnissara takorloorsimanngisaannarpara, senatori oqarpoq, nangillunilu:
- Piffissamik atuiffiginngisassaqarutta tamanna tassaassaaq Kalaallit Nunaannik pissaaneq, tatisineq siorasaarinerluunniit atorlugu tigusiniarsarinissaq.
Taassuma Jens-Frederik Nielsenip (D) tusagassiortunik sapaatip akunnerata siuliani ataasinngornermi katersortitsinermi oqaaserisai innersuussutigai.
- Naalakkersuisut siulittaasuata ikinngutigiit akornanni siorasaarnerit, tatisinerit tiguaanissamillu oqalunnerit atuuttussaanngitsut oqaatigaa. Kalaallit Nunaata siunissaa nammineq inuinit aalajangerneqartariaqarpoq. Tamanna uagut (Amerikamiut aaqq.) paasilluartariaqarparput.
Free Association
USA Kalaallit Nunaannut Compact aamma Free Associationimik isumaqatigiissusiornissamut siunnersuusiortoqartoq tusagassiuutit The Economistip tusatsiarpaa.
Isumaqatigiissut Kuno Fenckerip (N) Namminersorneq pillugu Inatsimmit pitsaanerunissaa naatsorsuutigaa.
- Kalaallit Nunaannut Danmarkimullu Compact of Free Associationimik isumaqatigiissuteqartoqarnissaa eqqartorneqartarpoq. Tamanna soqutigigunikku eqqartornissaa naleqartuusoraara, Lisa Murkowski oqarpoq.
- Kisianni (kalaallit aaqq.) taama iliornissaannut pinngitsaalisinnaanngilagut. Kalaallit Nunaat Danmarkilu ataqqineqarlutik isumaqatigiinniarfigineqartariaqarput.
Alaskamit senatorip Kalaallit Nunaata nunanut allanut periusissiaata taaguutaa: 'Pineqartilluta ilaassaagut' eqqaamaqquaa.
- Kalaallit Nunaat maannakkorpiaq oqaloqatiginngilarput; qulangerlugit oqaluuseraagut. Iligisat taama pissusilersorfigineqarneq ajorput.
Jens-Frederik Nielsenip oqaloqatiginera
Lisa Murkowski septembarimi Nuummiippoq. Taassuma naalakkersuisut siulittaasuat ilaatigut ataatsimeeqatigaa.
Taassuma oqalugiarnermini ataatsimiinnerminni qanoq oqartoqarsimanera oqaatigaa.
- USA-p Kalaallit Nunaat suniarneraa taassuma apeqqutigaa. Aatsitassat qaqutigoortut imaluunniit nunap sillimaniarnera pineqarpa? Taakkumi ikinngutitsinnut ilitsinnullu oqaloqatigiissutigisinnaalluarpagut; tamanna kaammattuutigaarput.
Lisa Murkowskip naalakkersuisut assigalugit Amerikamiut naalakkersuisuisa illugiissumik ataqqeqatigiiffiusumik oqaloqatigiinnerit aallarteqqinneqarnissaat kaammattuutigaa.
- Oqaloqatiginneriaatsit uku aallaqqaataaneerneqarnissaat kaammattuutigaara.
