Kangerlussuup mittarfiani annilaarnartumik misigisaqarfiusoq: Timmisartup nunninnissaa sioqqutilaarlugu qummukaqqiartariaqarsimavoq
Kangerlussuup mittarfianut timmisartup nunnillueqqissaalernerani tallimangormat ualikkut ilaasut ilaannut annilaarnartumik misigsaqarfiuvoq.
Timmisartoq Ilulissaniit Kangerlussuarmut nunninnissaannut meterit quliinnanngortut timmisartoq qummukartinneqariasaarpoq.
Taanna sioqqullugu, timmisartumut ilaasoq nukappiaraq igalaap saani issiasoq isumaqarsimavoq, timmisartup assakaasua ammukaartinneqarsimanngitsoq.
Ulorianarluinnaqqissaartumik kukkusoqartoqarsinnaanera pillugu nukappiaqqap ataataa Hansinnguaq Mathiassen timmisartumi saqisumut suaartartariaqarsimavoq.
Hansinnguaq sukkasuumik qisoriarpoq, timmisartullu nunninnissaa sioqqutilaaginnartorlu qummut aallarpoq.
- Kangerlussuarmut minniissarput siqqutilaaginnaraalu, ernerput oqariasaarpoq timmisartup assakaasua saamerleq ammukartinneqarsimanngitsoq.
- Isumannaallisaanermut qitequt peeriarlugu assakaasoq ammoortinneqarsimasoq takuara, taamalineranilu timmisartumi saqisup tupinnanngitsumik ingeqquaanga, Hansinnguaq Mathiassen taama oqaluttuarpoq imalu nangilluni;
- Assakaasoq timmisartup saamiatugaaniittoq anillassimanngilaq, taava timmisartumi saqisup timmisartumi aquttut kalerripallappai, taava miliiveruttorluta qullariasaarpugut, qummukaariasaarnitsinnilu assakaasoq ammukartinneqanngitsoq ammarpoq ingerlaannarlu matoqqilluni, qummukaaqqilluni, Hans Mathiassen taama oqarpoq.
Suli tupaqqavoq
Mathiassen ilaqquttanilu ingerlaannaq timmisartumut Danmarkliartumut ikiartorput, Air Greenlandimilu atorfilinnik oqaloqateqaratik misigisimasartik pilugu.
- Pisoq annilaarnartoq eqqarsaatigiinnavippara, Danmarkimut tikinnitsinniit akunnerit marlussuinnaaq sinippunga, assakaasormi ammukaartinneqarsimanngikkaluarpat qanoq pisoqarsimasinnaanera eqqarsaatiginarami, Hansinnguaq Mathiassen oqaluttuarpoq
Timmisartumut ilaasup allap, Akitsinnguaq Lulu Jensenip timmisartup assakaasuata ammukaaratinneqarsimannginnera aamma malugaa.
Akitsinnguaq timmisartortilluni annilaangasarpoq, timmisartullu minnialeraangata assakaasui ammukaartinneqarsimanersut arajutserusunneq ajorlugu.
- Kangerlussuarmut mikkiartornitsinni takusinnaavara timmisartup assakaasua saamerleq ammukaartinneqarsimanngitsoq.
- Minnissarput sioqqutilaaginnaraalu, angut tunutsinni issiasoq nilliavoq assakaasoq ammukaartinneqarsimanngitsoq. Tamannalu uanga aamma maluginiarpara, angut taama oqarfigaara, Akitsinnguaq oqarpoq.
Timmisartoq qummukareerluni Kangerlussuaq qulaavaavaa.
Timmisartup atortorissaarutai misissoqqissaarneqarput, timmisartullu assakaasui ajoquteqanngitsut misissuinermi takuneqarsinnaasut timmisartumi aquttut ilaasunut nalunaarutigaat.
Timmisartup aappassaanik mikkiartorneqarnerani minnissaq sioqqullugu timmisartumi aquttup assakaasut tamarmik ammukaartinneqarsimanersoq misissorpai.
Timmisartup assakaasui ajoquteqanngitsut timmisartuuleqatigiiffiup qulakkeerlugu oqaatigaa
Misissuinerminilu takusinnaavai assakaasut ammoortinneqarsimasut, siullermillu mikkiartornerminni aamma ajoquteqarsimanngitsut timmisartumi aquttup højtalerikkut ilaasunut nalunaarutigalugu.
Paatsiveerusimasojussuullutik tuparujussuarsimallutilu Hansinnguaq Mathiassen ilaquttanilu timmisartorsuarmut Danmarkiliartumut ikiartorput.
Hansinnguup takusani ilumoortuusoq aalajangiusimavaa.
Timmisartup qummut aallariasaarnerani timmisartup assakasua saamerleq ammukaarmat, siusinnerusukkuunngitsorlu.
- Timmisartumit niujartornitsinni timmisartumi saqisoq oqaluutillatsiarpara pisoq pillugu.
Soorlumi takusara pilllugu uppererpianngikkaanga, taassumalu aalajangiusimallugu oqarluni assakaasoq ammooqqasoq, kisianni tamanna ilumuunngilaq, Hansinnguaq Mathiassen oqarpoq.
Pisoq pillugu timmisartuutileqatigiifik Air Greenland oqaaseqarusunngilaq, tallimanngornermilu pisoq pillugu annerusumik paasisaqarfigeqqaarniaramikku.