Air Greenlandip timmisartunut mekanikerii aasaru suliumajunnaarnissamik ilimasaarisut
Air Greenlandip timmisartunut mekanikerii suliumajunnaarnissamik ilimasaaripput.
Suliumajunnaartoqassappat, tamanna juunip 23-ani aallartissasoq aamma nunatsiniit Danmarkimut timmisartuussinerit unitsinneqarsinnaasut ilimasaarutaallutik.
Suliumajunnaarnissamik ilimasaarinerit pipput, katuffiup Dansk Metalip aamma Air Greenlandip akissarsiat pillugit isumaqatigiissinnaasimannginneri.
Tamannalu pillugu Dansk Metalip aappassaanik suliumajunnaarnissamik ilimasaarinertik illuatungerisaminnut tunniuppaat.
Mekanikerit akissarsiaasa qaffanneqarnissaat Dansk Metalip piumasaraa, tamannali Air Greenlandimit isumaqatigineqarani. Tassalu akissarsiat qaffanneqarnissaannik isumaqatigiittoqarsinnaanngippat, angallannerpaaffiusup nalaani suliumajunnaarnissamik Dansk Metal ilimasaaruteqarluni.
Suliumajunnaarnissamik ilimasaarineq siorna upernaakkut aamma pivoq.
Taamani isumaqatigiinniarnerit iluatsinngimmata suliumajunnaarnissaq siunniunneqartorlu Air Greenland akivoq taamaattoqassappat mekanikerinik sulisitaqarumajunnaassallutik.
Siornali suliumajunnaarnissamik ilimasaarineq danskit isumaqatigiissitsiniartartuinit atorunnaarsinneqarpoq. Sulinermi atukkat pillugit atsioqatigiittoqarpoq akissarsialli pillugit kingusinnerusukkut, tassa ukioq manna isumaqatigiinniartoqarnissaa isumaqatigiissutaalluni.
Tassalu akissarsiat pillugit maanna isumaqatigiinniarnerit unittooqqapput.
Timmisartunut mekanikerit qaffasissumik akissarsiaqareersut suli amerlanernik akissasiaqalernissamik piumasaqarnerat ingasappallaartoq, Air Greenlandip sulisut pillugit pisortaata Mads Barlach Ckristensenip oqaatigaa:
- Ukiup ataatsip ingerlanerani akissarsiat qaffaatissaannik,´allanik suliaqartut ukiut pingasuniit sisamat ingerlanerini anguneqartartut amerlaqataannik piumasaqarput. Ukiut arlallit ingerlanerini akissarsiat qaffaatissaannut najoqqutassianik assigiinngitsunik arlalinnik neqerooruteqarpugut, taamaalillunilu Dansk Metalip ilaasortaasa ukiunut arlalinnut siumut qulakkeeriffigineqarnissaat atuisullu ukiut tamaasa suliumajunnaarnissamut ilimasaarneqarnermik eqqarsaateqartannginnissaat qulakkeerniarneqarpoq, Mads Barlach Kristensen tusagassiuutinut nalunaarummi oqarpoq.
Air Greenland piaartumik atuisut juunip ulluisa 23-ata kingorna angalasussat qanoq iliornissaannut paasissutissanik amerlanerusunik nalunaaruteqarumaarpoq.
Dansk Metalip oqaaseqartinneqarnissaa KNR-imit maanna ingerlapparput.
