Air Greenlandip timmisartumilu mekanikerit isumaqatigiinniarnerat ullumi aallartittoq
Upernaaq timmisartoqanngitsuussava imaluunniit Air Greenland timmisartuutileqatigiiffiullu timmisartumi mekanikeriisa akornanni nutaamik isumaqatigiissuteqartoqartoqassava?
Apeqqut taanna pillugu illuatungeriit Københavnimi isumaqatigiissitsiniartarfimmi ullumi naapissapput.
Sulisut peqatigiiffiat Dansk Metal Air Greenlandilu suliumajunnaartoqarnissaanik mattussinissamillu marsip qiteqqunnerani aarlerisaaruteqaramilli aatsaat siullermeertumik naapissaput.
Illuatungeriit tamarmik ataatsimut isumaqatigiissuteqarsinnaanissartik neriuutigaat:
- Soorunami Dansk Metal petatigalugu aaqqiissummik nassaarnissaq periarfissaassaaq, taamaalilluta aaqqiagiinnginneq pinngitsoortissinnaallugu, Air Greenlandip sulisoqarnermut pisortaa, Mads B. Christiensen KNR-imut allakkatigut akissuteqarpoq.
Dansk Metal aamma taama oqariartuuteqarpoq:
- Ammaffiginnilluta aaqqiagiinngitsunullu aaqqiissuteqarniarluta isumaqatigiinniariartuaannarpugut, isumaqatigiinniartartut pisortaat, Keld Bækkelund Hansen oqarpoq, nangillunilu:
- Aaqqiagiinnginnissarmi anguniagaasoq isumaqanngilagut. Aaqqiagiinnginnissamulli aarlerisaaruteqarneq anguniakkamik angusaqassutaasinnaavoq. Tamanna isumaqatigiinniutigaarput.
Aaqqiagiinnginneq suliumajunnaartoqarneranik mattussinermillu kinguneqarsinnaasoq
Isumaqatigiinngissutaasoq akissarsianut isumaqatigiissummullu qaangiussimasumut tunngassuteqarpoq. Timmisartumi mekanikerit Air Greenlandip akissarsiaritinniagaanit annerusumik akissarsiaqarusupput.
Isumaqatigiissitsiniartarfik
- oqartussaavoq sulisitsisut sulisullu nutaamik isumaqatigiissuteqarnissamut isumaqatigiissinnaanngikkaangata akuliuttartoq.
- aaqqiagiinnginnerit aamma suliumajunnaarnerit mattussinerillu pinngitsoortinnissaannik sulissuteqartarpoq.
- illuatungeriit isumaqatigiinniarnissaannut pinngitsaaliisinnaavoq, akornannilu isumaqatigiissitsiniartuusinnaalluni.
- suliujumajunnaarnissat mattussinissallu sapaatini akunnerni marlunni kinguartinnissaanut pisinnaatitaaffeqarpoq.
- Sankt Annæ Pladsimi Københavnimiippoq.
Paasissutissarsiffik: forligsinstitutionen.dk
Taamaammat Dansk Metalip timmisartumi mekanikerit apriilip ulluisa qulingiluaannit timmisartorsuarmi Kangerlussuup Københavnillu akornanni angalasartumi sulinerminnit suliumajunnaarniartut oqaatigaa.
Timmisartorsuarmi mekanikerit marluk sulisarput. Naalli inuit marluk kisimik suliumajunnaarniaraluartut tamanna aqqummik matusinermik kinguneqassaq.
Air Greenland akissuteqarluni timmisartuutileqatigiiffiup timmisartumi mekanikerimi sinneri akissarsiaqartinnagit apriilip ulluisa aqqarnannit angerlartinniarpai.
Taamaalillunilu nunatta iluani timmisartuussineq aamma matuneqassalluni.
Aaqqiagiinnginneq sivitsortuussappat allanik suliaqartut aamma eqqugaasinnaapput.
Air Greenlandimmi timmisartuutileqatigiiffiup sulisut sulianik peqatigiiffinnut allanut atassuteqartut aaqqiagiinnginneq piviusunngorluassappat timmisartumi mekanikerinut tapersersuillutik suliumajunnaarniarnissaat naatsorsuutigalugu pingasunngornermi nalunaarutigaa.
Taamaammat Air Greenlandip timmisartumi aquttut angallannermilu sulisut aamma mattunniarpai – tassa akissarsiaqartinnagit angerlartinniarpai. Mattussineq Dansk Metalip suliumajunnaartoqarnissaanik ulluliineranit sapaatit akunneri pingasut qaangiunneranni pissaaq.
Isumaqatigiissitsiniartartup illuatungeriit aqilisarniarsarai
Ajornartoornerli taama annertutigisariaqanngilaq. Illuatungeriimmi maanna imminnut qiviarlutik aaqqiissuteqarniarnissaannut pinngitsaalineqarput.
Isumaqatigiissitsiniartarfimmi isumaqatigiinniarnerit tallimanngornermi nunatta nalunaaqutaa naapertorlugu 10.30 aallartissapput.
AAMMA ATUARUK Suliffeqarnermut ilisimatooq akerleriinneq pillugu: Air Greenland aaqqiagiinnginnermi sakkortusaarpoq
Tamanna qanoq sivisutigissanersoq ilisimaneqanngilaq.
- Ilaanni illuatungeriit oqartoqartarneratigut aqilinissaata tungaanut isumaqatigiissinniarneqartarput. Tamanna isumaqatigiissitsiniartarfiup ileqqoraa, tassa illautngeriit ataatsimoortinniarlugit pissutsinik oqaloqatigiissillugit, Keld Bækkelund Hansen oqarpoq.