Suliffeqarnermut ilisimatooq akerleriinneq pillugu: Air Greenland aaqqiagiinnginnermi sakkortusaarpoq
Air Greenlandip timmisartumini mekanikerinut akissarsiaqarnerulerniartunut aaqqiagiinnginnertik annertusarnissaa aalajangerpaa.
Aalborg Universitetimi suliffeqarnermut ilisimatooq aamma Danmarkimi nunatsinnilu ilisimatusarsimasoq, Laust Høgedahl taama oqarpoq.
- Aaqqiagiinnginnermimmi annertusaanissartik nammineq aalajangerpaat. Air Greenlandip mattussinissani aalajangerunik taava annertusaavoq.
Laust Høgedahlip suliffeqarfiit isumaqatigiinniarnermi mattussinissamik atuisarnerat qaqutigoorluinnartuusoq erseqqissaatigaa.
Annikitsumik sakkortuumilli atuisoq
Isumaqatigiinniartut manna tikillugit imminnut ungasingaatsiartut isumaqatigiinniarnermilu ajornakusoorsimasut taassuma nalilerpaa.
Taakkuli tamarmik isumaqatigiinniarnermi killiussat iluanniipput. Isumaqatigiinniarnermili sakkussat annertuut qaqinneqartut, taassuma erseqqissaatigaa.
AAMMA ATUARUK Suliumajunnaarnissamut ilisimasalik: Mekanikerit Air Greenlandimut pissaaneqarput
Dansk Metal kalaallinit timmisartumi mekanikerinit 70-init ilaasortaaffigineqartoq Kangerlussuup Købehavnillu akornanni timmisartuussinermi suliumajunnaarnissamik aarlerisaaruteqartuuvoq.
Suliumajunnaarneq taanna timmisartumi mekanikerinik marlunnik ilaqarpoq.
- Dansk Metalip sakkugisaa annikitsunnguuvoq, taamaakkaluartorli annertullunilu sunniuteqarluarpoq. Taamaaliornermi Kalaallit Nunaata Danmarkillu akornanni aqqutip matuneqarnissaanik kinguneqassaaq, taanna oqarpoq, nangillunilu:
- Air Greenlandip iliuuserisaa sakkuusivimmi atorneqarsinnaasut annersaraat – aap, sannavimi annerpaavoq – tamanik mattussanikkut Dansk Metalimut sapinngisamik kimigiiserneruvoq. Taama ingasatsigisumik iliuuseqartoqartarnera qaqutigoorluinnarpoq.
Mattussineq nalinginnaasumik atorneqarneq ajoraluartoq
Mattussineq suliffeqarfinni namminersortut akornanni isumaqatigiinniarnermi nalinginnaasumik atorneqarneq ajoraluarpoq.
Tamannali sulisitsisumut aamma eqquingaatsiartarpoq. Suliffeqarfik tunisassiornerminik matusisariaqartarpoq, taamaalillunilu isertitassaminik annaasaqarlunilu tusaamaneqarneranut tamanna innarliisinnaavoq.
Pissutsini killeqannginnerusuni atuisartut suliffeqarfimmut aaqqiagiinngissuteqarfiusumut taartissaminnik allamik periarfissamik ujartuisinnaasarput.
Nunatsinnili atuisartut Air Greenlandimut tunngatillugu taamaaliorsinnaanngillat.
AAMMA ATUARUK Kunngissaq Frederik timmisartumik nunatsinnukariartortoq
Illuatungeriit naapeqatigiillutik isumaqatigiissuteqanngikkunik timmisartumi mekanikerit marluk suliumajunnaanerat apriilip ulluisa qulingiluaanni aallartissaat, Air Greenlandillu timmisartumi mekanikerit sinnerinut 70-inut mattussinera apriilip aqqarnani aallartissalluni.
Isumaqatigiinnginnerat sivisunaarneqarsinnaasoq
Taamali ajortiginissaa ilimananngilaq. Illuatungeriimmi maanna isumaqatigiinniartarfimmissapput, tassanilu assigiinngitsunik pisoqarsinnaavoq.
Siullertut illuatungeriit isumaqatigiinnissamut pisussaaffeqarput, tassa isumaqatigiinniarnissamut takkuttussaapput.
- Isumaqatiiinniartitsisup susoqarnissaa aalajangissavaa. Inuit ulluni arlalinni isumaqatigiinniartarfimmiitsillugit issiatillugit kiagutsillugit qasuitsinneqartarnerannut, taamaalillunilu taakkunannga nassuerutiginnittoqartitsisarluni oqaluttuassaqarpoq, Laust Høgedahl oqarpoq.
AAMMA ATUARUK Sulisut peqatigiiffiat: Mekanikerit marluk timmisartumik angallanneq unitsissinnaagaat
Tamatuma saniatigut isumaqatigiinniartitsisup aaqqiagiinnginneq inuiaqatigiinnut kingunerluuteqartitsisinnaappat tamatuma ullunik 14-init kinguartinneqarsinnaanera pisinnaatitaaffigaa.
- Marloriarlunilu taamaaliortoqarsinnaavoq, tassa illuatungeriit aaqqiissuteqarnissaannut pinngitsaalillugit aaqqiagiinnginnerat qaammat ataaseq tikillugu kinguartitsisoqarsinnaavoq. Tassa isumaqatigiinniartarfimmiinnerat sivisungaatsiarsinnaavoq, ilisimatooq oqarpoq.