Sulisut peqatigiiffiat: Mekanikerit marluk timmisartumik angallanneq unitsissinnaagaat
Inuit marluk suliumajunnaarniarnerat Danmarkip nunattalu akornanni timmisartuussinermik aamma nunatta iluani timmisartuussinermik unittoortitsisinnaavoq.
Sulisut peqatigiiffiata Dansk Metalip Greenlandillu akornanni isumaqatigiinniarnerminni isumaqatigiissinnaanngikkunik tamanna apriilimi pissaaq.
Tamannali nunatsinni timmisartuussinermik unittoortitsissaguni tamanna Air Greenlandip qinigarigaa, Dansk Metalimi allatsi aamma isumaqatiginniartartut pisortaat Keld Bækkelund KNR-imut oqarpoq.
- Air Greenlandip timmisartumi mekanikerit sinnerinik 68-inik nunatsinni timmisartunik isumaginnittartunit mattussinissaq Air Greenlandip aalajangigaraa, Keld Bækkelund oqarpoq.
Isumaqatigiissutit qaangiussimasut
Dansk Metal nunatsinni timmisartumi mekanikerit 70-it missaanniittut peqatigiiffigaat.
Norsaq Kangerlussuarmiikkaangat timmisartumik aserfallatsaaliuinermik suliaqartartut mekanikerit marluk suliumajunnaarniartuupput. Taamaalilluni Københavnip Kangerlussuullu akornanni timmisartuussinerit unissapput.
AAMMA ATUARUK Air Greenland aalajangiusimasoq: Timmisartuni mekanikerit suliumajunnaarniartut mattunniarai
Air Greenlandip timmisartumilu mekanikerit isumaqatigiissutaata 2020-mi qaangiuppoq, coronali timmisartuutileqatigiiffiullu unammissutai pissutigalugit 2021-mut sivitsuiniarlutik paaseqatigiinnikkut isumaqatigiissutigineqarpoq. Maannali 2022-mi timmisartumi mekanikerit akissarsiaqarnerulerusupput. Isumaqatigiinniarnerillu maanna unittoorput.
Taamaammat Dansk Metal Københavnip Kangerlussuullu akornanni timmisartuussinermi apriilip ulluisa qulingiluaannit suliumajunnaarsinnaanermik aarlerisaaruteqarpoq.
Apriilip aallaqqaataani ataatsimiissasut
Air Greenland akissuteqarluni timmisartumi mekanikerit, Dansk Metalimi ilaasortaasut tamarmik mattunniarpai. Mattussineq apriilip ulluisa 11-anni pissaaq, taamaalillunilu nunatta iluani timmisartut angalasinnaajunnaassapput.
Air Greenlandip oqarnera naapertorlugu atlantikoq qulaallugu timmisartuussineq angallannerup ilarujussuanut tassa nioqqutissanik, allakkanik nerisassanik allanillu assartuinissamut tunngaviliisuummat nunatta iluani timmisartuussinerup attatiinnarnissaa isumassaqanngilaq.
Dansk Metalip taamaattoqanngissoraa.
- Suli Kalaallit Nunaannukartoqarsinnaavoq. Taamaaliussagaannili Islandikkoorluni Iceland Air-imut ilaasoqassaaq. Taamaammat timmisartumut ilaaffissaqannginnermik oqarneq ingasappallaangajappoq, Keld Bækkelund oqarpoq.
- Air Greenlandip timmisartumi mekanikerit sinnerinik 68-inik mattussiniarnera tassunga ataqatigiinngilaq. Air Greenlandip sulisuminik mattussinissamik aalajangerneraa. Taakku timmisartukkut angalattoqanngeratarsinnaaneranut namminneq akisussaasuussapput.
AAMMA ATUARUK Suliumajunnaarnissamik aarlerisaarineq: Kalaallit Nunaanni silaannakkut angallanneq aprilimi unissinnaavoq
Siuariartoqarsinnaavorli.
Air Greenland Dansk Metalilu apriilip ulluisa aallaqqaataani isumaqatigiinninniartarfimmi apriilip ulluisa aallaqqaataanni ataatsimiissapput. Illuatungeriit tassani timmisartuutileqatigiiffiup timmisartumi mekanikeriinut isumaqatigiissuteqarniarsarissapput.