Air Greenland aalajangiusimasoq: Timmisartuni mekanikerit suliumajunnaarniartut mattunniarai

Nunatta Danmarkillu akornanni timmisartuussineq apriilip ulluisa qulingiluaanni unissinnaavoq.

Aamma Air Greenland timmisartuutileqatigiiffiullu timmisartuni mekanikerii nutaamik isumaqatigiissutissamik isumaqatigiissuteqarsinnaanngippata nunatta iluani timmisartukkut angallannerit tamarmik apriilip ulluisa aqqarnannit unissinnaallutik.

Sulisut peqatigiiffiat, Dansk Metal Air Greenlandip timmisartuisa mekanikeriinik ilaasortaqartoq taama ersaritsigisumik ullaaq manna nalunaaruteqarpoq.

Air Greenland akissuteqarluni timmisartumi mekanikerit tamarmik apriilip ulluisa aqqarnannit mattunniarpai. Tassa imaappoq timmisartumi mekanikerit akissarsiaqartinnagit angerlartinneqassapput. Taamaalillunilu nunatta iluani timmisartuussinerit aamma unissallutik.

Tamannalu allanngortinneqarnavianngitsoq, nunatsinni timmisartuutileqatigiifik ullap tungaani ataatsimiingaatsiaqattaareerluni nalunaaruteqarpoq.

- Nunap iluani angallannermik ingerlatsiinnarnissaq isumaqartussaanngilaq, Imarpik qulaallugu angallavik nunap iluani angallannerup annersaanut tunngaviliisuusarmat. Taamaattumik Dansk Metal-imiit suliumajunnaarnissamik ilisimasaarut nunatsinni silaannakkut angallannermik matusisuussaaq, Air Greenlandimi sulisoqarnermi pisortaq, Mads Barlach Christensen oqarpoq.

Isumaqatigiissutit qaangiussimasut

Air Greenlandip timmisartumilu mekanikerit isumaqatigiissutaat 2020-mi qaangiuppoq, coronali timmisartuutileqatigiiffiullu unammissutai pissutigalugit 2021-mut sivitsuiniarlutik paaseqatigiinnikkut isumaqatigiissutigineqarpoq.

Maannali 2022-mi timmisartumi mekanikerit akissarsiaqarnerulerusupput.

- Coronap atuunnerata nalaani Air Greenlandimi sulisuulluni artornarsimasoq Air Greenlandimiit nassuerutigineqarpoq. Timmisartunut mekanikerinuinnaanngitsoq, aammali ingerlatseqatigiiffimmi suleqatigiit tamarmik akissarsiat unitsinneqarnerinit, sulinermut atugassarititaasut allannguuteqarnerinit, suleqatitsialannik soraarsitsiortornermit il.il. eqqutaasimapput. Taamaattumik tamatuma kingunerisaanik kipiluttunartorsiortitsinerit paasilluarsinnaavagut, tassungalu akissarsiat annertuumik qaffatsinneqarnissaasa akuerineqarnissaannik pisariaqartitsineq ilaavoq, Mads Barlach Christensen oqarpoq.

AAMMA ATUARUK Suliumajunnaarnissamik aarlerisaarineq: Kalaallit Nunaanni silaannakkut angallanneq aprilimi unissinnaavoq

- Taamatut oqareerluta Air Greenlandimiit Dansk Metal-ip akissarsianik tunngaviusunik appaanerit pillugit saqqummiussai ilisarisinnaanngilagut. Dansk Metal-ip danskit suliffeqarneranni pissutsit aallaavigigai paasivarput. Naak sulisut ilaat Kalaallit Nunaanni suligaluartut taamatut pisoqarpoq.

- Air Greenlandimiit nunatsinni ineriartornerup annertoqataanik akissarsianut tunngaviusunut qularnaveeqqusiinissaq neqeroorutigineqarsimagaluarpoq. Aamma taakku isumaqatigiissutinut, qanittukkut ilaatigut SIK-p ataani sulisugut pillugit isumaqatigiissutigeriikkatsinnut assingusuupput. Tamatuma saniatigut aamma Air Greenlandimiit sulinermut aaqqissuussinerit pilerinartut, illuatungeriinnut iluaqutaasussat neqeroorutigineqarput.

Poorskimi timmisartoqassanngitsoq

Air Greenlandip taamaalilluni timmisartumi mekanikerinik suliumajunnaarnissamik aarlerisaaruteqartunik mattussiniarnini allanngortinngilaa – illutungeriit imminnut tunniutiinnarfigerusunngitsut taamaalillutik Danmarkip nunattalu akornanni timmisartuussinermik apriilip ulluisa qulingiluaannit aamma nunatta iluani timmisartuussinermik apriilip aqqarnannit matusilluinnaratarsinnaapput.

- Suliumajunnaarnissap pinngitsoorniarneqarnerata ingerlaannarnissaa Air Greenlandimiit neriuutigineqarpoq. Pingaartumik poorski sioqqullugu nalaanilu atuutsinneqaleriaannaammat, piffissamilu tassani nunatsinni pissartanngorniunnerit ilaqutariillu ataatsimoortarneri annertunerpaasarput. Piffissami tassani suliumajunnaartoqassappat, tamanna inuiaqatigiinnut tamarmiusunut eqquinerlungaatsiartussaavoq, Mads Barlach Christensen oqarpoq.

- Tamannali pissappat Dansk Metal kalaallit atugaannut annertunerujussuarmik paasinnittariaqarpoq.

Kattuffimmi allatsi aamma Dansk Metalimi isumaqatiginniartartut pisortaat Keld Bækkelund aamma taama oqariartuuteqarpoq.

- Air Greenland nikeriarnianngivippat suliumajunnaarnissatsinnut piareersimavugut. Sunaluunniit pillugu isumaqatiginniarnissatsinnut piareersimavugut,. Kisianni Air Greenland nikeriarnissaa piumasaqaataavoq, Keld Bækkelund oqarpoq.

Suliumajunnaartoqassappat ajornartoornissamut upalungaarsimanerup, tassalu napparsimasunik timmisartuussisarnerup SAR-illu ingerlaannarnissaat pillugu Dansk Metal-imut isumaqatiginninnarnerit aallartinneqassapput.