Suliumajunnaarnissamik aarlerisaarineq: Kalaallit Nunaanni silaannakkut angallanneq aprilimi unissinnaavoq
Kalaallit Nunaata Danmarkillu akornanni timmisartuussinerit apriilip ulluisa qulingiluaanni unitsinneqarsinnaapput taamatullu Kalaallit Nunaani timmisartuussinerit apriilip ulluisa aqqarnganni unitsinneqarsinnaallutik, Air Greenlandip timmisartuini mekanikerit kattuffimminnik isumaqatigiissinnaanngippata.
Timmisartumi mekanikerit kattuffiat Dansk Metal tusagassiuutinut taama allappoq
Air Greenlandip timmisartuini mekanikerit kattuffiat Danske Metal allappoq, arlaleriaqalutik akissarsiat pillugit isumaqatiginniartaraluarlutik illuatungeriit isumaqatigiissinnaasimanngillat.
Taamaattumik Dansk Metal Kastrupip Kangerlussuullu akornanni timmisartuussinerni suliumajunnaartoqarnissaa aarlerisaarutigaa.
AAMMA ATUARUK Silap ajornera teknikkikkullu ajutoorneq: Ulluni tulliuttuni tallimani inniminniisoqarsinnaanngitsoq
- Ilaasortatta akissarsiaasa pisissutaasinnaanissaat illersorparput.
Suliffeqarfik aningaasarsiorluarpat ilaasortatta akissarsiaasa pisissutaasinnaanerisa millisinneqarnerat akuerisinnaanngilluinnarparput
Sulisut naleqartitsinermik pilersitseqataanikuupput taamaattumillu tamanna malugisariaqarpaat.
Air Greenland nikeriarnianngivippat suliumajunnaarnissatsinnut piareersimavugut, kattuffimmi allatsi aamma Dansk Metalimi isumaqatiginniartartut pisortaat Keld Bækkelund tusagassiuutinut nalunaarummi taama oqarpoq.
Suliumajunnaarnissamut piareersimapput
Air Greenlandimi mekanikerit kattuffiannit Dansk Metalimit oqaatigineqartoq naapertorlugu illuatungeriit akornanni naapeqqinnissamik maannakkut pilersaaruteqartoqanngilaq.
- Sunaluunniit pillugu isumaqatiginniarnissatsinnut piareersimavugut,. Kisianni Air Greenland nikeriarnissaa piumasaqaataavoq, Keld Bækkelund oqarpoq imalu nangilluni.
- Corona pissutigalugu timmisartuussisarnerit eqqorneqarput, taamaakkaluartoq timmisartuutileqatigiiffik Air Greenland sinneqartooruteqarpoq taamaattumik naleqquttorujussuuvoq sulisut pisissutigisinnaasaminnik akissarsiaqartinneqarnissaat pissusissamisoormat. Tamannalu pillugu suliumajunnaarnissamut piareersimavugut.
Air Greenlandip timmisartunilu mekanikerit akornanni akissarsianut isumaqatigiissut 2020-mi atorunnaarpoq corona taamatullu timmisartuussisarnerni pissutsit unammineqartut pillugit isumaqatigiissut 2021-ip tungaanut sivitsorneqarpoq.
Air Greenlandimit oqaaseqartitsinissamut KNR maanna sulissuteqarpoq.