Silap ajornera teknikkikkullu ajutoorneq: Ulluni tulliuttuni tallimani inniminniisoqarsinnaanngitsoq
Ulluni tulliuttuni tallimani Air Greenlandimit billetsimik inniminniinissat eqqartsaatigisimagukku tamanna puiuinnarallartariaqarpat.
- Sineriammi silap pissusia atoruminaappoq, tamatuma saniatigut timmisartut arlallit teknikkikkut suli aserfallatsaaliorneqarput, Air Greenlandip attaveqaqatigiinnermut pisortaam Katha Vahl oqarpoq.
Taamaammat timmisartuutileqatigiiffiup billetsinik nioqquteqarnini marsip ulluisa 19-iat ilanngullugu unitsikkallarpaa.
Angalasut katillugit 250-it eqqugaapput, kisitsillu nikerarsinnaasoq timmisartuutileqatigiiffik paasissutissiivoq.
Nunatta iluani timmisartuussinermi sapaatip akunnerata siuliani teknikkikkut aamma ajornartorsiuteqartoqarpoq. Timmisartumut ilaasussat katillugit 456-it tamatumanik eqqugaapput. Timmisartoq qulimiguullillu marluk teknikkikkut aserfallatsaaliorneqarput, timmisartorlu ataaseq Canadami pilersaarutaasumik misissorneqarluni.
AAMMA ATUARUK Air Greenland-ip kinguartoornissat ilimasaarutigai: Ilaasut 456-it eqqugaassapput
- Timmisartumut sillimmatissamaatit pilersaarutit malillugit timmisartuussinnaassagutsigit sapaatip akunnerani matumani timmisartuussisinnaaleqqinnissarput naatsorsuutigaarput. Taamaakkaluartorli timmisartumik ataatsimik Canadami aserfallatsaaliorneqartoqarpoq, Katja Vahl oqarpoq.
Timmisartumut ilaanissaminnut inniminneereersimasut kisimik ulluni tulliuttuni tallimani ingerlanneqassapput.
- Timmisartut atulersinnaalerseqqinnissaat suli sulissutigaarput, tamatuma sanaitigut angallannermut pilersaarutitsinnik allannguissaagut, ilaasussat taamaalillutik apuuffissaminnut apuussinnaassammata, Katja Vahl oqarpoq.
Timmisartumut ilaasussat ingerlaavartumik paasissutissiivigineqartassapput, Air Greenlandillu ilaasussat tamarmik mailiminnik, sms-ersiaminnik Club Timmisamiillu app-iminnik sapaatip akunnerani aggersumi eqqumaffiginninnissaannik kaammatuuteqarfigai.
