Air Greenland-ip kinguartoornissat ilimasaarutigai: Ilaasut 456-it eqqugaassapput
Timmisartuutileqatigiiffiup Air Greenlandip timmisartuutaanut ilaallutit sapaatip akunnerini tulliiuttuni angalassaguit angalanissap taamaatinneqarnissaanut kinguartinneqarnissaanulluunnit piareersimasariaqarputit.
Tamatumunnga pissutaavoq timmisartuutileqatigiiffiup Air Greenlandip timmisartui arlaqartut aserfallatsaalineqarmata, silallu ajortarneranik angalaniarneq akornusersorneqarluni.
Angalasussat 456-it tungaanut eqqugaassasut, timmisartuutileqatigiiffik taama paasissutissiivoq.
- Ajuusaarnaqaaq pisut ataatsikkut taama pimmata, silamillu akimmisaartinneqaqqissagutta, timmisartuussinissat aamma allanngorteqqittariaqassapput. Ilaasussat tamaasa piaarnerpaamik ilisimatittarpavut, persaqqusersuinerpullu ajuusaarutigalugu, Air Greenlandip Attaveqaqatigiinnermut pisortaa Katja Vahl tusagassiuutinut nalunaarummi taama oqarpoq.
Silap ajornerata saniatigut Air Greenlandip timmisartuutaa Dash8-200 maannakkut pilersaarutaasumik Canadami teknikkikkut aserfallatsaalineqarpoq.
Tamanna nalerorlugu Dash-8 alla qulimiguullillu marluk pilersaarutaanngitsumik teknikkikkut aserfallatsaalineqartariaqalersimallutik.
Timmisartuutileqatigiiffiup Air Greenlandip Islandimi timmisartuutileqatigiiffik Iceland Air timmisartumik attartorfiginiarlugu saaffigisimagaluarpaa tamannali iluatsissinnaasimanngilaq.
- Ilaasut apuukkumallugit immikkoortortani tamani aaqqiiniarluta ulappuppugut, Katja Vahl taama oqarpoq.
Martsip 11-ata 21-atalu akornanni ilaasussat tamarmik angalanissaat allangortinneqareerput.
Angalasussat eqqorneqartut tamarmik allannguutit pillugit nassinneqassapput nalunaarfigineqarlutillu, Katja Vahl taama nalunaarpoq.