Suliumajunnaarnissamut ilisimasalik: Mekanikerit Air Greenlandimut pissaaneqarput

Air Greenlandimi mekanikerit akissarsiaasa aaqqiagiinngissutaanerat pillugu Air Greenland maanna aarlerisaarivoq nunap iluani timmisartuussinnerit apriilip aqqarngaaniit unitsinneqaratarsinnaasut.

Aarlerisaarinerlu tamanna piviusunngussappat, aamma imarpik qulaallugu timmisartuussinerit apriilip qulingiluaaniit kalluarneqarsinnaapput.

Tamatuma piviusunngornissaanut qanoq piviusorsiortigiva?

KNR-miit Jakob Pedersen aperaarput. Taanna piginneqataassutsinut tunngasunut aammalu timmisartoqarfinni aningaasanik kaaviiaartitsinermut tunngasunut Sydbankenimi immikkut ilisimasaqartuuvoq.

- Tamanna oqaatigiuminaappoq, suliffissuarnulli allanut sanilliussissagutta, taava ernumasoqartariaqassaaq, tassami suliffiit timmisartoqarfinnut tunngassuteqartut suliumajunnaartoqartillugu eqqorneqarnerpaasarput. Air Greenlandilu flymekanikerinik allanik taartissaqanngilaq, taanna oqarpoq.

Flymekanikerit nukittuumik inissisimapput

Ataaserli nuannersumut tunngasoq qularnanngilaq: Tassalu, mekanikerit nukittuumi inissimammata. Air Greenlandimi flymekanikerinik allanik toqqagassaqanngilaq. Tassalu imaappoq, mekanikerit Air Greenlandilu isumaqatigiinneq ajulerpata, taava timmisartut aappaluttut tingisinngiinnarneqarsinnaapput.  

- Air Greenlandimi Kalaallit Nunaanni allanik isumalluutissaqanngilaq, tassalu imaappoq isumaqatigiinniarnermi nukittuumi inissisimapput, piumasartillu pinngikkunikku suliaminnik unitsitsiinnarsinnaapput, Jacob Pedersen oqarpoq.

AAMMA ATUARUK Suliumajunnaarnissamik aarlerisaarineq: Kalaallit Nunaanni silaannakkut angallanneq aprilimi unissinnaavoq

Flymekanikerit kattuffiata Dansk Metalip Air Greenland aarlerisaarpaa nunatsinneersut ilaasortarisatik marluusut tassa Københavnip Kangerlussuullu akornanni angallannermut akisussaasuusut suliumajunnaariaannaasut, taakkulu marluk tassaapput timmisartorsuaq Norsaq Kangerlussuarmut tikikkaangat isumannaallisarlugu suliarinnittartuusut. Taamaammalluuna Københavnip Kangerlussuullu akornanni timmisartuussinerit unissinaasut.

Aningaasarsiat qaffannissaat

Pisut najummatsisimanartumut killinnissaannut peqqutaasoq tassaavoq, Air Greenlandip flymekanikerinut isumaqatigiissutaa 2020-mut killilik atorunnaarmat, coronali pissutaalluni isumaqatigiissut 2021-p tungaanut tasikkallarneqartariaqarsimavoq.

Maannali 2022-miippugut maannalu aamma akissarsiatik qaffakkusulerpaat, isumaqatigiinniarnerillu unittoorput.

Taamaalillunilu aamma Dansk Metalip aarlerisaarutigaa, Københavnip Kangerlussuullu akornanni timmisartuussinerit apriilip qulingiluaaniit suliumajunnaarnermik peqquteqartumik unissinnaasut.

Air Greenlandili akeqqippoq. Nuna tamakkerlugu nunap iluani timmisartuussinerit tamarmik flymekanikerinit Dansk Metalimut ilaasortaaffigineqartut tamarmik unissasut, 

AAMMA ATUARUK Air Greenland aalajangiusimasoq: Timmisartuni mekanikerit suliumajunnaarniartut mattunniarai

Air Greenlandimi naapertorlugu, nunap iluani timmisartuussinerit isumaarutissapput imarpik qulaallugu timmisartuussinerit nioqqutissanik, allakkerisarfikkoorussassanik, nerisassanillu assartuinermut tunngaviusoq unitsinneqarpat. 

Mekanikerit kattuffiata, Dansk Metalip akuersaarsinnaanngilaa ilaasortarisamik akissarsiamikkut appasissumi inissisimatinneqarnissaat, illuatungaani Air Greenlandip aningaasaqarnera nukittuumik inissisimatillugu, taama Keld Bækkenlund KNR-mut oqarpoq taanna kattuffimmi allaffimmiuullunilu isumaqatigiinniarnermi pisortaavoq.

Air Greenlandip 2020-mut ukiumoortumik naatsorsuutai millionilikkaanik sinneqartooruteqarsimasut allassimasuutigineqarput, tassami akileraarutit peereerlugit 30,6 millioninik 2020-mi Air Greenland sinneqartoorpoq.

Akit qaffakkiartorput

Flymekanikerilli qanoq annertutigisumik noqqaasinnaappat? tamanna akiuminaappoq, immikkut tamatumunnga ilisimasalik Jakob Pedersen oqarpoq.

- Akit naleerukkiartornerisa nassataanik akornusiineq ukiunut tulliusunut marlunnut qanoq ililluni matussusiisoqarnissaa siumut oqaatigiuminaappoq, tassami assersuutigalugu naluarput ukiup affaa ukiorluunniit ataaseq qaangiuppat uuliap akia qanoq issanersoq, Jacob Pedersen oqarpoq.

Immikkut ilisimasalik taanna naapertorlugu, nalileruminaappoq Ruslandip Ukrainemut saassussinerata kingorna aningaasaqarnerup kalluarneqarnera qanoq sunniuteqarnerlutsigissanersoq.

- Maannakkut pissutsit atuuttut naapertorlugit, Ruslandip Ukrainemut saassussinerata kingorna sutigut tamatigut akit qaffapput, uuliamut aki qaffappoq, atortussiassanut akit qaffapput aammalu inuussutissanut akit qaffallutik, tamakkulu tamarmik akissaqassutsimut pisisinnaassutsimullu sunniuteqarput, Jakob Pedersen naliliivoq.

Air Greenland aamma Dansk Metal apriilip aallaqqaataani isumaqatigiinniarlutik ataatsimeeqatigiissapput. Illuatungeriit flymekanikerit isumaqatigiissutaat isumaqatigiissutigeriaraluassavaat, Dansk Metal KNR-mut taama ilisimatitsivoq.