Aaqqiagiinnginneq sakkortusisoq: Air Greenlandip timmisartumi aquttunut angallannermilu sulisunut mattussinissaq aarlerisaarutigigaa

Erseqqissaassuteqarneq sisamanngorneq marsip ulluisa 31-at nal. 11:17: Timmisartumi saqiqsut mattussisinnaanermut aamma ilaatinneqartut, Air Greenlandip KNR-imut ippassaq paasissutissiissutigigaluarpaa. Air Greenlandili timmisartumi aquttut angallannermilu sulisut kisimik ilaasut kingusinnerusukkut paasissutisseeqqippoq.

Air Greenlandip aamma sulisut peqatigiiffiata Dansk Metalip akornanni aaqqiagiinnginneq sakkortusiartorpoq.

Taakku timmisartumi mekanikerit pillugit nutaamik isumaqatigiissinnaanngikkunik Air Greenlandip sulisut allat arlallit akissarsiaqartinnagit apriilip ulluisa aqqarnannit angerlartissavai.

Tassani timmisartumi aquttut angallannermilu sulisut pineqarput.

Timmisartuutileqatigiiffimmi allanik suliaqartut timmisartumi mekanikerit tapersersorlugit suliumajunnaarniarnissaat naatsorsuutigineqarmat timmisartuutileqatigiiffik taama aarlerisaaruteqarpoq.

- Dansk Metalip suliumajunnaartoqarnissaanik aarlerisaarinermi saniatigut Air Greenlandimi suliatigut peqatigiiffiit allat sulianut tunngasunik kattuffimmi Fagbevægelsens Hovedorganisation FH-imiittut aaqqiagiinnginnermi tapersersuillutik suliumajunnaarniarnissaat aamma naatsorsuutigineqartariaqartoq paasissutissiissutigaa, Air Greenland KNR-imut mailikkut allappoq.

- Pisumi tassani nalinginnaalluinnarpoq, sulisitsisup mattussinissamik akissuteqarlunilu sulisut pineqartut assinganik mattunnissaanik aarlerisaaruteqarnera, timmisartuutileqatigiiffiup sulisoqarnermut immikkoortortaani pisortaq, Mads B. Christensen oqarpoq.

AAMMA ATUARUK Air Greenland Dansk Metalimik aaqqiagiinngissut pillugu: Tamanna inuiaqatigiinnut kalaallinut ipisitsiartuaassaaq

Dansk Metalip timmisartuutileqatigiiffiup nalunaarutaa aaqqiagiinnginnermi pisariaqanngitsumik sakkortusiartornerunerarpaa.

- Annertuumik aaqqiagiinnginnerulersitsiniartoqarpoq, tamanna kalaallinut eqquingaatsiassasoq isumaqarpugut, sulisut peqatigiiffiata isumaqatigiinniarnermut pisortaa, Keld Bækkelund Hansen oqarpoq.

Ilissi siulliullusi suliumajunnaarnissamik nalunaaruteqarpusi. Mattussineq sulisitsisutut akissutigineqarsinnaasuni kisimiinngila?

- Aaqqiagiinnginnermik annertunerulersitsiniaraanni taama oqartoqarsinnaavoq. Malittarisassat malinneqarput. Maanna oqaatigiinnarparput tunngavigisatsinnit allarluinnarmut maanna annertusiisoqalerpoq. Taamaalilluni mekanieritta kiassarsiassaannut tunngatillugu apeqqummi kalaallit inuiaqatigiit tamarmik sunniivigineqarlutik, Keld Bækkelund Hansen oqarpoq.

Akissarsiaqarnerorusuttut

Illuatungeriit akissarsianut tunngassuteqartoq aaqqiagiinngissutigaat.

Timmisartumi mekanikerit Air Greenlandip tunniukkusutaanit annerusumik akissarsiaqarusupput.

Taamaammat Dansk Metalip timmisartumi mekanikerit timmisartumi Kangerlussuup Københavnillu akornanni timmisartumi apriilip ulluisa qulingiluaannit suliumajunnaarniarput.

AAMMA ATUARUK Suliffeqarnermut ilisimatooq akerleriinneq pillugu: Air Greenland aaqqiagiinnginnermi sakkortusaarpoq

Naak suliumajunnaarnermi timmisartumi mekanikerit marluinnaat pineqaraluartut tamanna aqqummik matusinermik kinguneqassaaq.

Air Greenland akissuteqarluni timmisartuutileqatigiiffiup timmisartumi mekanikerimi sinneri akissarsiaqartinnagit apriilip ulluisa aqqarnannit angerlartinniarpai.

Taamaalillunilu nunatta iluani timmisartuussineq aamma matuneqassalluni.

Mattussillunilu angerlartitsineq taanna allanik suliaqartunut aamma eqquisussanngorpoq.

Timmisartumi mekanikerinut mattussineq apriilip ulluisa aqqarnannit aallartippat timmisartumi aquttut, angallannermilu sulisut mattunneqarnerat Dansk Metalip suliumajunnaarnissamik nalunaarutigisaanit tassa apriilip ulluisa qulingiluaannit  sapaatit akunneri pingasut qaangiunneranni aallartissaaq.

Tallimanngorpat isumaqatigiinniassasut

Taamali ingasatsigisariaqanngilaq.

Air Greenlandimi Dansk Metalilu Københavnimi nutaamik tallimanngorpat isumaqatigiinniaqqissapput.

Isumaqatigiinniarneq isumaqatigiinniartitsisarfimmi, isumaqatigiinniarnerit unittooraangata akuulertartumi ingerlanneqassapput.

AAMMA ATUARUK Air Greenland suliumajunnaartoqarniarnerani billetinik utertitsisoq

Isumaqatigiissitsiniartarfiup suliumajunnaarnissaq mattussinissarlu inuiaqatigiinnut kingunerluttussaasutut nalilerneqarpata aamma kinguartissinnaavai.

Air Greenlandip timmisartumilu mekanikerit akornanni isumaqatigiissut 2020-mi atorunnaarpoq, coronali timmisartuutileqatigiiffimmullu unammillerartut pissutigalugit isumaqatigiinniarnerit 2021-mut kinguartinneqarnissaat isumaqatigiissutigineqarnikuuvoq.