Air Greenland Dansk Metalimik aaqqiagiinngissut pillugu: Tamanna inuiaqatigiinnut kalaallinut ipisitsiartuaassaaq
Suliatigut peqatigiiffik Dansk Metal Air Greenlandimi timmisartuni mekanikerit akissarsiaat pillugit piviusorsiortuunngitsumik piumasaqarpoq inuiaqtigiillu kalaallit pisariaqanngitsumik tatillugit.
Air Greenlandip intranetimini massakkulu tamanit takuneqarsinnaasunngorlugu allakkamini ima atilimmi "MATTUSSINISSAQ KISIAT PERIARFISSARAARPUT" oqariartuutigaa.
Timmisartortitseqatigiiffik isumaqarpoq Dansk Metalip Kalaallit Nunaat iperarnaveerlugu tigummigaa timmisartuni mekanikerit marluk Norsami sulisut suliumajunnaarnissaannik ilimasaaruteqarnermigut. Tamatuma Kalaallit Nunaannut pilersuinerup ilarujussua unitsissavaa, imaaliallaannaq allanngortinneqarsinnaanngitsoq, assersuutigalugu Islandimut ingerlaqqinnissamut aqqusaagassatut.
- Pissusiviusut tassaapput, ullumikkut suliassaq Airbus 330-220, sapaatit akunnerannut sisamaniit arfineq marluk tikillugit timmisartuussisartoq, 278-inik ilaasoqarsinnaasoq, taakkulu saniatigut nassiussanik, soorlu nakorsaanermi misissugassanik, pilersuinermi, kingoraartissaqarnermilu il.il. pisariaqartinneqartunik, ullormiit ullormut allamut kinguartinneqarsinnaanngitsunik suleriaaseq atorlugu siumut utimullu assartugassanik nassarsinnaasoq atorlugu pisariaqartitsineq taanna naammassineqartarmat, Air Greenlandimi HR-imi pisortaasoq Mads B. Christensen allakkani oqarpoq.
Norsami timmisartunut mekanikereqanngippat imarpik qulaallugu timmisartortarneq unitsinneqartariaqassaaq, tamatumalu nunap iluani timmisartuussineq annertuumik kigaallatsissavaa.
AAMMA ATUARUK Sulisut peqatigiiffiat: Mekanikerit marluk timmisartumik angallanneq unitsissinnaagaat
Taamaattumillu Air Greenlandip sakkortuuliorneq sakkortuuliornermik akisariaqarpaa timmisartunilu mekanikerit tamaasa apriilip ulluisa aqqarnaniit suliartornissaannut mattullugit - lockoutimik taaneqartartoq.
- Tamannarpiaq peqqutigalugu Air Greenland sulisitsisutut, aaqqiagiinngissuteqarnissamik ilimasaaruteqarnermut atatillugu sakkussatuaminik atuisariaqalerpoq, tassalu suliassaqarfimmi sulisunik tamanik mattussinissaq, Dansk Metalip suliumajunnaarnissamik ilisimasaaruteqarneranut akissutaasussaq, Mads B. Christensen oqarpoq.
Timmisartuni mekanikerit unammillersinnaanissaq peqqutigalugu noqittariaqarput
HR-imi pisortap Dansk Metalip timmisartuni mekanikerit akissarsiaqarnerulernissaannik piumasaqarnera isornartorsiorpaa, pingaartumik covid-19-imik ajornartorsiornerup, atatsimut isigalugu timmisartortitseqatigiiffinnut akisusimaqisup, kingornatigut.
Kisianni Air Greenland 2020-mik aniguivoq koruuninik 30 milliuuningajannik sinneqartooruteqarluni. Kisianni Nuummi Ilulissanilu mittarfiit nutaat naammassippata unammillerneq annertunerulissasoq ingerlatsiviup naatsorsuutigaa. Mekanikerillu tassuunakkut sipaaqataasariaqarput.
AAMMA ATUARUK Air Greenland suliumajunnaartoqarniarnerani billetinik utertitsisoq
- Ukiuni tulliuttuni bilitsinut akit apparnissaannut akissaqarnissaq pingaaruteqartorujussuuvoq. Taamaattumik aamma akissarsiat piviusorsiortumik ineriartornissaat pingaaruteqarpoq – aamma Dansk Metalip ilaasortaanut. Mads B. Christensen oqarpoq.
Kisianni tunngavilersuut taanna atorsinnaanngilaq, akissuteqarnermini Dansk Metal allappoq, akissullu taanna suliatigut peqatigiiffimmut ilaasortaminut Air Greenlandimiittunut aamma KNR-imut nassiunneqarpoq.
Dansk Metalip Air Greenlandillu akornanni isumaqatigiissut 2017-2020-mut naapertorlugu timmisartuni mekanikerip tunngaviusumik akissarsiai qaammammut 29.114,75 kr.-imiit 33.993,89 kr.-imut annertussuseqarput, qanoq sivisutigisumik atorfeqarsimanera apeqqutaalluni.
Ilanngunneqassapput tapit assigiinngitsut arlaqaqisut ilaatigut nikittaraalluni sulineq, qaangiuttoorneq, piareersimasuutitaaneq, sammisanutb pisortatut atuunneq, assigiinngitsunik allanngorartunik suliartortarneq il.il.
Uani isumaqatigiissut tamaat takusinnaavat.
Tassami Air Greenland.ip aningasaqarnera ajunngivippoq. Aammalu timmisartumi mekanikerit isumaqatigiiniarnissat coronap qaangiunnissaanut kinguartinissaat akueraat, Dansk Metal erseqqissaavoq.
- Taamaattumik suliatigut peqqutissaqanngilaq suleqataasut akissarsiaannik ikilisaanissamut timmisartortitsiviit allat ilanngullugit aningaasaqarneq tungavilersuutigissallugu. Paasisinnaalluarparput Air Greenland annertusaarusummat, kisianni tassani suleqataasut timmisartunik timmisinnaatitsisut pilliutigineqassanngillat, suliatigut peqatigiiffik akissummini allappoq.
Akissarsianut piumasaqaatinik isornartorsiuineq
Air Greenlandimi sulisut 70 missaanniittut Dansk Metalimut ilaasortaapput, massakkorpiaq isumqatigiissuteqanngitsumik sulisut, taannami 2021-mi atorunnaarmat.
Isumaqatigiissummut nutaamut Dansk Metalip akissarsiat qaffanneqarnissaat Danmarkimi akit qaffakiartornerannut naleqquttoq piumasaraa, taamannalu massakkorpiaq qaffakkiartupiloorpoq februaarimilu 5,3 procentit angullugit.
Kingunerisaanik nioqqutissat akii qaffapput, timmisartunilu mekanikerit akissarsiaannut naleqqussartariaqarpoq, Dansk Metal isumaqarpoq.
Kisianni Air Greenland naapertorlugu timmisartuni mekanikerit akissarsiaat nunatsinni ineriartornermut naapertuuttumut naleqquttariaqarput – massakkorpiarlu ineriartorneq taanna Danmarkimit annikinneruvoq. Taamaatumik ingerlatsiviup maani nunatsinni ineriartornermut naleqquttumik, aammalu sulisunut, SIK-p HK-llu ataanni atorfilinnut isumaqatigiissutaareersunut, aammalu sulisunut ataasiakkaanut, katillugit 275-inut isumaqatigiissutinut naapertuuttumik isumaqatigiissusiornissaq neqeroorutigaa.
AAMMA ATUARUK Suliffeqarnermut ilisimatooq akerleriinneq pillugu: Air Greenland aaqqiagiinnginnermi sakkortusaarpoq
- Taanna akissarsiat ineriartornerannut piviusorsiortumut naleqquppoq, tamatumalu peqatigisaanik bilitsit akikinnerulernissaannik anguniagaqarnerput angusinnaavarput, Mads B. Christensen oqarpoq:
Kisianni Dansk Metal nalunaarpoq oqaluttuarisaanerup takutikkaa akit ineriartornerat aamma Kalaallit Nunaannut annguttartoq. Taamaattumik timmiartuni mekanikerit akissarsiaqarnerulertariaqarput.
- Nunarsuarmi tamarmi massakkorpiaq tamanna atuuppoq – Kalaallillu Nunaata eqqorneqannginnissaa takussutissaqanngilaq, Dansk Metal akissummini allappoq.
Taamaalitinnagu illuatungeriit isumaqatigiinngippata Air Greenlandip mattussinera apriilip ulluisa aqqarnaniit atuutilissaq. Kisianni illuatungeriit Isumaqatigiissitsiniartartuni apriilip aallaqqaataani isumaqatigiissuteqarnissaq neriuutigalugu ataatsimiissapput.