Air Greenland suliumajunnaartoqarniarnerani billetinik utertitsisoq
Air Greenlandimi suliumajunnaartoqassappat billetit apriilip qulingiluaaniit apriilip 23-ata tungaanut pisiat suuneri apeqqutaatinnagit utertinneqarsinnaassapput.
Air Greenland tusagassiuutinut nalunaarummi taama allapput.
Imarpik qulaallugu timmisartuussisartumik Norsami mekanikerit marluk suliumajunnaarnissaannik timmisartumik mekanikerit peqatigiiffiat, Dansk Metal, siorasaaruteqarpoq. Tassalu suliumajunnaassappata apriilip qulingiluaaniit Københavnimiit Kangerlussuarmut timmisartuussisoqarsinnaassanngilaq.
Isumaqatigiissut qaangiuttoq
Pisut najummatsisimanartumut killinnissaannut peqqutaasoq tassaavoq, Air Greenlandip flymekanikerinut isumaqatigiissutaa 2020-mut killilik atorunnaarmat, coronali pissutaalluni isumaqatigiissut 2021-p tungaanut tasikkallarneqartariaqarsimavoq.
Maannali 2022-miippugut maannalu aamma akissarsiatik qaffakkusulerpaat, isumaqatigiinniarnerillu unittoorput.
Taamaammat Dansk Metal Københavnip Kangerlussuullu akornanni timmisartuussinermi apriilip ulluisa qulingiluaannit suliumajunnaarsinnaanermik aarlerisaaruteqarpoq.
Air Greenland akissuteqarluni timmisartumi mekanikerit, Dansk Metalimi ilaasortaasut tamarmik mattunniarpai. Mattussineq apriilip ulluisa 11-anni pissaaq, taamaalillunilu nunatta iluani timmisartut angalasinnaajunnaassapput.
Air Greenlandip oqarnera naapertorlugu atlantikoq qulaallugu timmisartuussineq angallannerup ilarujussuanut tassa nioqqutissanik, allakkanik nerisassanik allanillu assartuinissamut tunngaviliisuummat nunatta iluani timmisartuussinerup attatiinnarnissaa isumassaqanngilaq.
Taamatullu siorasaaruteqarneq sapaatit akunnerata siuliani Air Greenlandimit akineqarpoq. Timmisartumi mekanikerit, Dansk Metalimut ilaasortat suliumajunnaassappata nunatta sinnerani mekanikerit sulisikkumajunnaarniarlugit akissuteqarpoq.
Air Greenlandip mekanikerini apriilip aqqarnganiit sulisikkumajunnaarneqarpata, nunatta iluani timmisartuussisoqarnavianngilaq.
Killiffik eqqarsaatigalugu naaperiaanermik ataatsimiittoqarnissaa iliuusissatut tullertut inissisimavoq. Air Greenland Dansk Metalilu naaperiaaniarlutik apriilip aallaqqaataani timmisartuutileqatigiiffiup mekanikeriisa akissarsianut isumaqatigiissut isumaqatiginninniutigissavaat.
Suliumajunnaartoqassappat suliumajunnaartoqassanngikkaluarpalluunniit maannamiit billetinik utertitsisoqarsinnaasoq, Air Greenlandili tusagassiuutinut nalunaarummini allappoq:
- Pisisartugut apriilip qulingiluaaniit 23-ata tungaanut angalasussat billetiminnik maannamiit utertitsisinnaapput, tamannalu suliumajunnaartoqassagaluarpat suliumajunnaartoqanngikkaluarpalluunniit atuuppoq.
- Atuisut 2022-mi 9. apriilip aamma 23. apriilip akornanni angalasussaagunik, suliumajunnaartoqarnissaa suliumajunnaartoqannginnissaaluunniit apeqqutaatinnagu maanna billetitik utertissinnaalereerpaat. Atuisut neqeroorummik taassuminnga atuiniarlutik, kisiannili suliumajunnaartoqanngitsoornerani aallaannarniarlutik aalajangissagunik, billetimik nutaamik, pisiamit siullermit allaanerusinnaasumik pisisoqartariaqarnissaa eqqumaffigineqassaaq.