Eqikkaaneq: Erngup nukinganik nukissiornermut atuinissamik akuersissutip ukiuni 40-nit 60-inut sivitsorneqarnissaa siunnersuutigineqartoq
Inatsisartut ukiaanerani ippassaq marlunngornermi ataatsimiinnerat malinnaaffiginngitsoorsimagukku KNR-ip eqikkaanera uani atuarsinnaavat.
Inatsisartut ippassaq marlunngornermi ataatsimiinneranni, erngup nukingata nukissiornermut atorneqartarnera pillugu Inatsisartut inatsisaata allanngortinneqarnissaa Avatangiisinut, Pinngortitamut, Nukissiuutinut Ilisimatusarnermullu Naalakkersuisoq Jørgen Rosbach (D) siunnersuutigaa.
Naalakkersuisut allannguutissatut siunnersuutaat ingerlatseqatigiiffinnut suliffeqarfinnullu soqutiginnillutik aningaasaliiumasunut atugassarititaasut pitsaanerulissasut oqaatigineqarpoq.
Aningaasaliisartut aningaasaleerusussuseqarnerulernissaat siunertaasoq
Akuersissutinik tunniussisarnerup ukiuni 40-nit 60-inut sivitsorneqarnissaa siunnersuummi allanngortinneqartussani pingaarneruvoq. Taamaalilluni suliniutip annertussusissaa aningaasaqarneralu apeqqutaatillugit naalakkersuisut akuersissummik ukiunik 60-inik sivisussuseqartumik tunniussisinnaanissaat periarfissaalissaaq.
Inatsisartut inatsisaannik allanngortitsinissamut siunnersuuteqarnermi aningaasaliisartut aningaasaleerusussuseqarnerulernissaat, sullissinermilu pitsaanerusumik sullinneqartalernissaat siunertarineqarpoq.
Jørgen Rosbachip (D) oqaaseqaatini naggaserlugu Naalakkersuisut inatsisissatut siunnersuutip akuerineqarnissaa innersuussutigaa.
Partiit sisamaasut tassa Naleraq, Siumut, Atassut Demokraatillu ataatsimiititaliamut susassaqartumut aammalu Eqqissisimatitsinermut Avatangiisinullu ataatsimiititaliamut sukumiisumik suliarineqartussanngorlugu ingerlateqqinneqarnissaa innersuussutigaat.
Inuit Ataqatigiinniillu akerliunertaqanngitsumik akuerineqarluni.
Ataatsimiititaliamut ingerlateqqinneqartoq
Inatsisartut inatsisaannik allanngortitsinissamut siunnersuut aappassaaneerneqannginnerani Sanaartornermut ataatsimiititaliamut ingerlateqqinneqarpoq.
Ippassaq ataatsimiinnermi siunnersuutit marluk aamma oqallisigineqarput tassaasut:
Sermip erngullu niuernermi atorneqartarneri pillugit Inatsisartut inatsisissaattut siunnersuut.
Kalaallit Nunaanni najugallit aatsitassarsiorfinni ullumikkut siunissamilu sulilersinnaanissaannut, pitsanngorsaasoqarnissaanullu tigussaasumik pilersaarusiortoqarnissaanik Naalakkersuisut peqquneqarnissaat Inatsisartut aalajangiiffigisassaattut siunnersuut.
Ataatsimiinnermi oqallisigineqartut tamarmik oktoberip 20-anni aappassaaneerneqarlutik oqallisigineqassapput.
