Naleqqap nunanit allanit suliartortut ukiut sisamat qaangiukkaangata angerlartittalerusukkai
Nunanit allanit suliartortut ukiuni sisamani nunatsinniittassapput.
Tamanna Naleqqap siulittaasua Pele Broberg isumaqarpoq, taassumalu nunanit allanit suliartortut killilersorneqarnissaannut siunnersuutaa Inatsisartuni marlunngornermi oqallisigineqarpoq.
Naatsorsueqqissaartarfik naapertorlugu nunanit allanit suliartortut 2.829-t januaarip aallaqqaataani 2026-mi nunatsinniipput.
Taakkulu danskisut nunaniluunniit avannarlerni innuttaassuseqanngitsuupput.
Ukiut qulit kingulliit ingerlaneranni, pingaartumik Asiamiut, amerliartuinnavipput.
Brobergip oqarneratut malittarisassat najugaqartut suliffigilersinnaasaannik illersuinngippallaarnerat amerliartuinnarnerannut takussutissaanerarpaa.
- Amerlavallaarput imatut paasillugu, ersarippallaaleqqapput kalaallit suliffissaralui tigooqqarlugit taakkununnga tunniussorneqarmata, KNR-imut oqarpoq.
Sulineq najugaqarnerlu immikkoortikkusukkai
Naleqqap ukiuni marlunni sulisinnaanermut akuersissuteqartoqarsinnaanera ataasiaannarlunilu qaavatigut ukiuni marlunni sivitsuisoqarsinnaanissaa siunnersuutigaa.
Taamaaleriarluni nunanit allanit suliartortoq aatsaat nunatta avataani ukiuni marlunni najugaqareerluni akuersissummik nutaamik qinnuteqarsinnaassaaq.
Partiip suliffimmut allamut nuunnissamut, ilaquttat ilaginerinut ataavartumillu najugaqalernissamut periarfissat tungaatigut malittarisassat oqallisigineqarnissaat aamma kissaatigaa.
- Uagut ajorinngiivipparput maanga nuukkusussappata. Kisianni atugassarititagut assigiittariaqarput, taavalu suliartornermut qinnuteqarneq, taavalu maani nunaqavissunngorusunneq assigiinngitsuupput qinnuteqaatit marluk. Taamaammat avissaartittariaqarput taakku marluk, taavalu tamarmik isummerfigisariaqarparput immikkut, Pele Broberg oqarpoq.
Malittarisassat sakkukippallaarnerarpai nunatsinnilu immikkut ittumik pissutsit naammaginartumik eqqarsaatigineqannginnerarlugit.
Danskilliuku oqartussaasui nunanit allaneersunut killeqarfimmullu tunngatillugu allaffissornikkut aningaasaqarnikkullu akisussaasuusut.
Naalakkersuisut tusarniaaffigineqarput aalajangiisussaanatilli.
IA-p akisussaaffik Danmarkimit tigorusukkaa
Kalaallit sulisartut nukittorsarneqarnissaat sulisullu nunanit allaneersut nakkutigineqarnerunissaat soqutigineqarluartoq, Inatsisartuni oqallinnermit paasinarsivoq.
Partiilli ukiunut sisamanut nalinginnaasumik killiliinissaq isumaqatigiissutiginngilaat.
Inuit Ataqatigiit nunanit allaneersut pillugit susassaqarfimmut akisussaaffik Danmarkimit Kalaallit Nunaannut piaartumik nuunneqartariaqarsoraat.
Nunatta nunani allamiunut akisussaaffik piaartumik tigusariaqaraa Inuit Ataqatigiit isumaqarput.
Partiip malittarisassat maanna atuuttut nunanit allanit sulisussanik aallernissamut ajornanngitsitsinerat aamma isornartorsiorpaa.
Malittarisassat atuuttut naapertorlugit kommune ullut 14-it ingerlaneranni qisuariaateqanngippat nunanit allanit sulisussanik atuinissamut akuersissummik tunniussisoqarsimasutut isiginnittoqarsinnaavoq.
Taamaammat IA-p nunatsinni suliffissanut malittarisassat aamma allanngortikkusuppai.
Partiip kalaallit suliffissaaleqisut inissaqarnissamut pitsaanerusumik periarfissaqartitsineq ilaatigut aqqutigalugu nunap ilarujussuani sumiiffinnut allanut atorfinitsinneqarsinnaasut aamma erseqqissaatigaa.
Demokraatit ukiunut sisamanut killiliinissaq mianersoqqussutigigaat
Demokraatit nunatsinneersut suliffissamut ilinniaqarnissamullu pitsaanerusumik periarfissaqarnissaanik qulakkeerinissaq aamma kissaatigaat, ukiunullu sisamanut killiliinermik aaqqiissuteqarnissaq pisariaqartutut isiginngilaa.
Partiip maannakkut sulisut atuuffigisaminnut taarsiisussaqannginneranni aallassappata suliffeqarfiit sulisussanik nutaanik avataanit aallertariaqarsinnaalersinnaanerat mianersoqqussutigaa.
Demokaraatilli sulisussanik pisariaqartitsineq sumi amigaataanerpaanersoq aamma pisariaqartitat suut nunatta ilinniarneq pikkorissaanerlu aqqutigalugit matussusersinnaanerai ataatsimoortumik erseqqissarneqartikkusuppaat.
Siumup kalaallit suliassaqarfimmut nammineq aalajangiisinnaatitaanerulernissaa suliffeqarfiillu nunanit allanit sulisunik atuinerannik nakkutilliinerup nukittunerulernissaa kissaatigaa.
Partiip nunanit allanit suliartortut akissarsianik appaanissamut imaluunnit najugaqareersunut periarfissanik ajornarnerulersitsinissamut atorneqassanngitsut erseqqissaatigaa.
Naalakkersuisut aqutsineq nukittorsarniaraat
Naalakkersuisut nunanit allanit suliartortut amerliartornerisa ernumassutigineqarnera paasilluarpaat.
Taakku suliniutit aqutsinermik nakkutilliinermillu nukittorsaatit sulissutigeqqinniarlugit paasissutissiissutigaat.
Naalakkersuisuttaaq nunamiissinnaanermut sulinissamullu akuersissutit pillugit malittarisassat matumani qinnuteqarnermi akiliutaasinnaasut ilanngullugit ineriartornerat malinnaaffigaat.
Oqallinneq malittarisassanik nutaanik aalajangersaanavianngilaq. Naleqqap siunnersuutaani nunanit allanit suliartortut piffissami killeqarnerusumi qanoq atorneqartalersinnaanerannik saniatigullu suliffeqarfiit sulisussanik pisariaqartitsinerannik isumaginninnissamik oqallisiginninnissaq siunertaavoq.
Nunatta najukkami suliffissaqartitsinissaq suliffeqarfiillu sulisussanik pisariaqartitsinerata akornanni qanoq naligiissaarinissaanut tunngaviusumik apeqqummik pilersitsivoq.
Aningaasaqarnermiimmi kisitsisit nunanit allanit suliartortut suliffissaqartitsinermit ataatsimoortunit ikittuinnaasut takutippaat.
Kisitsisilli nunatta sulisussanik pisariaqartitaanik tamanik matussusiiniarnini ajornakusoortikkaa aamma takutippaat- sulisinnaasullu ukiunit qulini aggersuni ikinnerulerpata tamanna ajornartorsiutaanerulersinnaavoq.
